Malayziyanın Terenqqanu şəhərindəki xəstəxanada yüksək dərəcədə antibiotikə davamlı və ölümcül Acinetobacter baumannii ştammı aşkar edilib. Alimlər sözügedən bakteriyanın dünya miqyasında geniş yayılmış və xalq sağlamlığı üçün ciddi təhlükə yaradan GC2 nəslinə aid olduğunu açıqlayıblar.
Elchi.az xəbər verir ki, tədqiqatçılar 2011-2020-ci illər arasında bölgədən toplanmış 126 bakteriya nümunəsini tədqiq ediblər.
Nəticələr bakteriyaların bir sıra antibiotiklərə qarşı müqavimət göstərdiyini üzə çıxarıb. Xüsusilə A.baumannii infeksiyalarında ümumiyyətlə ilk seçim olan karbapenem qrupunun antibiotiklərinə qarşı yüksək səviyyədə müqavimət aşkar edilmişdir.
Araşdırmanın nəticələri Microbial Genomics jurnalında dərc olunub. Beynəlxalq tədqiqat qrupu, tədqiq etdikləri nümunələrin 97%-nin antibiotik müqavimətini yaymaqdan məsul olan plazmid DNT-dən ibarət olduğunu bildirdi.
“Nəzarətin olmaması ciddi risk yaradır”
Araşdırmanın həmmüəlliflərindən biri, Birmingem Universitetindən Dr. David Cleary araşdırma ilə bağlı aşağıdakı qiymətləndirməni etdi:
“A. baumannii-nin bu təhlükəli ailəsinin xəstəxanalarda yayılmağa davam etdiyinə dair yeni sübutlarımız var. Bununla belə, aşağı və orta gəlirli ölkələrdən əldə edilən məlumatlar az olaraq qalır. Xəstəliyin necə inkişaf etdiyini başa düşmək onun yayılmasının qarşısını almaq və effektiv müalicə üsullarını inkişaf etdirmək üçün çox vacibdir”.
Cleary bu ölkələrdə antibiotiklərə qarşı müqavimətlə mübarizə aparmaq üçün daha effektiv nəzarət sistemlərinə və yeni müalicə protokollarına ehtiyac olduğunu vurğulayıb. “GC2 nəslinin üstünlüyü və karbapenem müqavimətinin yüksək səviyyəsi ictimai sağlamlıq üçün ciddi təhlükə yaradır” dedi.
Beynəlxalq əməkdaşlıq həyati əhəmiyyət kəsb edir
Tədqiqatın aparıcı müəllifi və Malayziyanın Sultan Zaynal Abidin Universitetindən Prof. Chew Chieng Yeo aşağıdakı ifadələrdən istifadə etdi:
“Tədqiqatımız çoxlu dərmanlara davamlı bakteriyaların yayılmasına qarşı beynəlxalq tədqiqat əməkdaşlığının nə qədər vacib olduğunu göstərir. Xüsusilə bəzi bölgələrdən məlumat çatışmazlığı olduqda, bu əməkdaşlıq daha da kritik olur.”
A. baumannii bakteriyaları; Qan, ağciyər, sidik yolları və yara infeksiyalarına səbəb ola bilər. Xüsusilə xəstəxanalar kimi səhiyyə müəssisələrində infeksiyalara səbəb olduğu bilinir. Ümumdünya Səhiyyə Təşkilatı (ÜST) bu bakteriyanı antibiotik müalicəsinə davamlı patogenlər arasında “kritik prioritet təhlükə” kimi təsnif edir.
Yeganə
