Futbol üzrə İran çempionatının 25-ci turu çərçivəsində Güney Azərbaycan təmsilçisi “Traktor” növbəti qələbəsini qazanıb.
Elchi.az xəbər verir ki, görüş Təbrizin “Səhənd” stadionunda keçirilib. “Traktor” doğma azarkeşlər önündə Tehranın “İstiqlal” klubunu qəbul edib. Gərgin idman mübarizəsi şəraitində keçən qarşılaşma Təbriz təmsilçisinin 2:1 hesablı qələbəsi ilə yekunlaşıb.
Komandanın hər iki qoluna Əmirhüseyn Hüseynzadə imza atıb. O, matçın 24-cü və 37-ci dəqiqələrində fərqlənib.
Bu qələbə sayəsində “Traktor” xallarının sayını 54-ə çatdıraraq, turnir cədvəlində liderliyini möhkəmləndirib. Komandanın ən yaxın izləyicisi “Sepahan” isə 49 xalla ikinci yerdə qərarlaşıb.
Qeyd edək ki, İran çempionatının cari mövsümünün başa çatmasına cəmi 6 tur qalıb.
Təbriz təmsilçisinin qələbəsi Güney Azərbaycanda böyük sevinclə qarşılanıb. Azarkeşlər stadionda Azərbaycan və Türkiyə bayraqları ilə “Traktor”a dəstək nümayiş etdirib, oyundan sonra isə milli şüarlar səsləndiriblər.
