Qazaxıstan prezidenti Kasım-Jomart Tokayev Orta Asiyanın dünyada iqlim dəyişikliyindən ən çox təsirlənən bölgə olduğuna diqqət çəkərək, oradakı ölkələrin koordinasiya etməli və hərəkətə keçməli olduğunu bildirib.
Elchi.az xəbər verir ki, Tokayev Özbəkistanın Səmərqənd şəhərində keçirilən Birinci Avropa İttifaqı (Aİ) -Mərkəzi Asiya Sammiti çərçivəsində keçirilən “Mərkəzi Asiya Qlobal İqlim Təhlükələri qarşısında: Ümumi Rifah Naminə Həmrəylik” adlı beynəlxalq konfransda çıxış edib.
Orta Asiyanın dünyada iqlim dəyişikliyindən ən çox təsirlənən region olduğunu vurğulayan Tokayev, buradakı ölkələrin bu mövzuda koordinasiya etməli və hərəkətə keçməli olduğunu bildirib.
Bölgədə sürətlə artan hava istiliyinin dünya ortalamasının iki dəfə yüksək olduğunu söyləyən Tokayev, “Region buzlaqların əriməsi, səhralaşma və su qıtlığının artması kimi ekstremal təbii fəlakətlərdən əziyyət çəkir” deyib.
Özbəkistanla birlikdə quruyan Aral dənizinin dibində meşəsalma işləri apardıqlarını ifadə edən Tokayev, “İqtisadiyyatlarımızın böyüməsi ilə iqlim gündəmi arasında düzgün tarazlığı tapmalıyıq. Bu çərçivədə qeyd etmək istərdim ki, bütün Qazaxıstanda ağac əkmək vəzifəsini öz üzərimə götürmüşəm”.
Tokayev Mərkəzi Asiyanın üzləşdiyi digər mühüm problemin su ehtiyatları olduğunu vurğulayaraq, “Son 20 ildə adambaşına düşən su ehtiyatı 30 faiz azalıb. Bundan əlavə, regional su ehtiyatının 70 faizi sərhədləri keçən çaylardan ibarətdir. Ona görə də suya qənaət edən texnologiyaların, ağıllı suvarma və hidroloji monitorinqin inkişafında beynəlxalq ictimaiyyətin dəstəyinə ehtiyacımız var”, – deyə qiymətləndirmə aparıb.
Nuranə Məmmədova
