NATO-nun baş katibi Mark Rutte bildirib ki, müttəfiqlər gələcəkdə ümumi təhlükəsizliyin təmin edilməsi üçün birgə addımlar atmaq üçün 76 ildir etdikləri kimi birlikdə çalışmalıdırlar.
Elchi.az xəbər verir ki, Rutte 3-4 aprel tarixlərində Brüsseldəki qərargahında keçirilən NATO Xarici İşlər Nazirləri Toplantısının sonunda mətbuata açıqlama verib.
4 aprelin NATO-nun yaranmasının ildönümü olduğunu xatırladan Rutte, “76 il əvvəl 12 ölkə bir araya gələrək bu ittifaqı quran müqavilə imzaladı. Müttəfiqlər bu illər ərzində təhlükəsizliyi təmin etmək üçün birlikdə çalışdılar” – deyib.
Rutte vurğulayıb ki, iki günlük görüş zamanı müttəfiq ölkələr gələcəkdə NATO ərazisinin təhlükəsizliyini birgə təmin etmək əzmində olduqlarını nümayiş etdiriblər.
Baş katib bildirib ki, Avropa və Kanada müttəfiqləri NATO-nun iclasında ilk dəfə iştirak edən ABŞ-ın yeni dövlət katibi Marko Rubiodan Donald Tramp administrasiyasının NATO-ya bağlılığı barədə çox aydın mesaj alıblar.
Nuranə Məmmədova
