Danimarkanın baş naziri Mette Frederiksen ABŞ-a xəbərdarlıq edib ki, beynəlxalq təhlükəsizliklə bağlı arqument olsa belə, başqa ölkəni ilhaq edə bilməz.
Elchi.az xəbər verir ki, bu barədə baş nazir Frederiksen ABŞ prezidenti Donald Trampın Qrenlandiya səfəri zamanı ada ilə bağlı söylədiyi fikirlərlə bağlı açıqlamalar verib.
Qrenlandiyanın həm yeni, həm də köhnə liderləri ilə görüşən Frederiksen Danimarkanın etibarlı NATO müttəfiqi olduğunu qeyd edib.
Müttəfiq kimi bir-birinin bölünməsinə icazə vermənin düşmənlərinə xidmət etmək mənasına gəldiyini vurğulayan Frederiksen bunun qarşısını almaq üçün əlindən gələni edəcəyini bildirib.
“Bizim şirkətlərimizdən ABŞ-a sərmayə qoymağı xahiş etdiyiniz zaman, onlar da bunu edirlər. Bizdən müdafiəmizə daha çox xərcləməmizi tələb etdiyiniz zaman, biz də bunu edirik. Arktikada təhlükəsizliyi gücləndirməyimizi istəyəndə biz razılaşırıq”, – Frederiksen deyib.
Baş nazir Frederiksen sözlərinə belə davam edib: “Amma siz Danimarka Krallığının ərazisinin bir hissəsini ələ keçirməyi tələb edəndə, ən yaxın müttəfiqimiz tərəfindən təzyiq və təhdidlərlə üzləşdikdə, bu qədər illərdir heyran qaldığımız ölkə haqqında nəyə inanaq? Bu, Atlantik okeanının o tayında birlikdə qurduğumuz dünya nizamı məsələsidir. Başqa bir ölkəni, hətta beynəlxalq təhlükəsizlik arqumentinə görə də ilhaq edə bilməzsiniz.”
Frederiksen ABŞ-ı Arktikada təhlükəsizliyin gücləndirilməsi ilə bağlı bunu birlikdə etməyə çağırıb.
Trampın Qrenlandiya ilə bağlı açıqlamaları…
Yenidən seçildiyi gündən bəri Qrenlandiyanı ölkəsinin nəzarəti altına almaq istəyini tez-tez dilə gətirən Tramp Ağ Evdə beynəlxalq təhlükəsizliyi təmin etmək üçün onların Qrenlandiyaya sahib olması lazımdır deyib.
Qrenlandiyanın hər yerində dolaşan Çin və Rusiya gəmilərinin varlığından narahat olduğunu bildirən Tramp, bu vəziyyətlə məşğul olmaq üçün Danimarkaya və ya başqasına etibar etmədiklərini qeyd edib.
Digər tərəfdən həyat yoldaşı Usha Vance, ABŞ-ın enerji naziri Kris Rayt və milli təhlükəsizlik müşaviri Mike Waltz ilə Qrenlandiyaya səfər edən ABŞ vitse-prezidenti JD Vance burada verdiyi açıqlamada Danimarka rəhbərliyinin Qrenlandiyanın təhlükəsizliyinə kifayət qədər sərmayə qoymadığını müdafiə etdi.
“Hamınızın bildiyiniz kimi, bu, böyük bir işdir və qarşıdakı onilliklər ərzində daha da böyüyəcək. Qrenlandiyada daha çox mövqelərə sahib olmalıyıq”, – Vance bildirib.
O, hərbi güc tətbiq etmədən Qrenlandiya xalqının son nəticədə ABŞ-ın və onun adaya nəzarət etmək istəyinin tərəfini tutacağına inandığını söyləyib.
Yeganə
