Çin ABŞ-ın ölkədən idxal etdiyi məhsullara “qarşılıqlı tariflər” çərçivəsində tətbiq etdiyi 34 faizlik gömrük rüsumuna cavab olaraq, ABŞ şirkətlərinə qarşı ixrac qadağaları, məhdudiyyətlər və araşdırmalar da daxil olmaqla sanksiyalar elan edib.
Elchi.az xəbər verir ki, Çin Ticarət Nazirliyindən verilən açıqlamaya görə, 27 ABŞ şirkəti ixrac nəzarəti və ya qadağa siyahısına əlavə edilib.
Şirkətlərdən 16-nın hərbi və mülki ikili istifadə üçün məhsullarının ixracı qadağan olunduğu halda, 11 şirkət ixrac qadağası olan “etibarsız qurum” siyahısına salınıb.
Nazirlik Çinin milli təhlükəsizliyini və maraqlarını qorumaq və nüvə silahlarının yayılmaması ilə bağlı beynəlxalq öhdəliklərə əməl etmək məqsədilə 16 ABŞ şirkətinin ixrac nəzarəti siyahısına daxil edildiyini bildirib.
Müdafiə, aviasiya, dron istehsalı, kəşfiyyat və logistika sahələrində fəaliyyət göstərən şirkətlərin Çinə ixracatları yoxlamaya məruz qalacaq.
Qeyd olunub ki, Skydio və BRINC Drones kimi pilotsuz uçuş aparatları istehsalçıları da daxil olmaqla 11 şirkət Çinin suverenlik mübahisəsi olan Tayvanla texnoloji əməkdaşlığa görə “etibarsız varlıq” siyahısına daxil edilib.
ABŞ qrupuna qarşı antiinhisar araşdırması başladıldı Nazirlik həmçinin ABŞ və Hindistandan idxal edilən bəzi tibbi tomoqrafiya borusu məhsulları ilə bağlı antidempinq araşdırması və bu kateqoriyadan olan məhsulların ümumi idxalı ilə bağlı rəqabət araşdırması başlatdığını açıqlayıb.
Bu arada, Çinin Bazarın Tənzimlənməsi üzrə Dövlət İdarəsi ABŞ-ın çoxmillətli kimya şirkəti DuPont-un Çindəki törəmə şirkəti ilə bağlı antiinhisar qanunlarını pozmaqda şübhəli bilinərək araşdırmaya başlayıb.
Çin Baş Gömrük İdarəsi həmçinin ABŞ-dan olan altı şirkətin Çinə quş əti məhsulları və sorqo ixracına icazələrini ləğv edib.
Bu, Trampın “qarşılıqlı tarif” artımından sonraya təsadüf edir. Çinin bu addımı ABŞ prezidenti Donald Trampın “qarşılıqlı tariflər” çərçivəsində Çinə 34 faiz əlavə rüsum tətbiq edəcəyini açıqlamasından sonra baş verib.
Vaşinqton administrasiyası 24 faizlik “qarşılıqlı tarif” daxil olmaqla, 10 faizlik baza tarifinə əlavə olaraq Çinə ümumilikdə 34 faiz əlavə gömrük tarifi tətbiq ediləcəyini açıqlamışdı.
Yeni tarif artımları ilə ABŞ-ın Çindən idxal etdiyi məhsullara tətbiq etdiyi minimum tarif 54 faizə yüksəldi.Pekin administrasiyası həmçinin ABŞ-ın “qarşılıqlı tariflər” çərçivəsində tətbiq etdiyi 34 faizlik tarif artımına cavab olaraq eyni tarifdə əlavə tarif tətbiq edəcəyini açıqlayıb və həmçinin bəzi nadir torpaq elementlərinin ixracına məhdudiyyətlər qoyub.
Nuranə Məmmədova
