Kolumbiya prezidenti Qustavo Petro İsrailin Qəzza zolağına bütün humanitar yardımların daxil olmasını dayandırmaq qərarına münasibət bildirib.
Elchi.az xəbər verir ki, Kolumbiya prezidenti Qustavo Petro sosial media platformasındakı X hesabında etdiyi paylaşımda Avropanı İsrailə qarşı səssiz qalmamağa çağırıb.
İsrailin bütün humanitar yardımların Qəzza zolağına daxil olmasını dayandırma qərarına reaksiya verən Petro, “Bu, insanlığa qarşı növbəti cinayətdir. Avropa indi reaksiya verməlidir. Ukraynada xəyanətə məruz qalan Avropa irrasionalizmin güclənməsinə qarşı beynəlxalq hüququ müdafiə etməlidir” dedi.
Beynəlxalq ictimaiyyətin hərəkətə keçməsi lazım olduğunu deyən Petro, “Avropa və Latın Amerikası xalqları beynəlxalq hüququ müdafiə etmək və günahsız uşaqları hədəf alan yeni vəhşiliklərin qarşısını almaq üçün güclü ittifaq quraraq birləşə bilər” dedi.
İsrail Qəzzada atəşkəs və əsir mübadiləsi razılaşmasının birinci mərhələsi başa çatdıqdan sonra Qəzza zolağına humanitar yardım axınını dayandırıb.
Şayəstə Hüseynova
