Hər il mayın 8-i dünyada Beynəlxalq Talassemiya Günü kimi qeyd olunur.
Elchi.az xəbər verir ki, bu gün 1994-cü ildə Beynəlxalq Talassemiya Federasiyası tərəfindən təsis edilib. Günün əsas məqsədi talassemiyadan əziyyət çəkən şəxslərlə bağlı görülməsi vacib olan tədbirlər barədə ictimaiyyəti məlumatlandırmaqdır. Bu tədbirlərə ilk növbədə profilaktika, keyfiyyətli tibbi xidmətin əlçatanlığı, sosial inteqrasiya, elmi tədqiqatlara və yeni terapevtik yanaşmalara çıxış daxildir. “Qan Donorları Assosiasiyası” ictimai birliyi hər il ictimaiyyətin diqqətini talassemiya probleminə yönəltmək məqsədilə müxtəlif silsilə tədbirlər həyata keçirir. Bu məqsədlə, 7 may tarixində Respublika Qan Bankının və “Adalia” Beynəlxalq Qadın Platformasının təşkilatçılığı, həmçinin “Tərəqqi” Sosial İnkişaf İctimai Birliyi, Azərbaycan Talassemiya Federasiyası, “İntellektual Eko-Etik Alyans” İctimai Birliyi, Könüllü Gənc Qan Donorlarını birləşdirən Club-25, “AZSTUDY” MMC və Strateji.az xəbər portalının dəstəyi ilə “Bir damla, bir həyat” şüarı altında könüllü qanvermə aksiyası təşkil olunub. Qeyd edək ki, aksiyada toplanan qanlar talassemiya xəstələrinin müalicəsində tam təmənnasız istifadə ediləcək.
