1970-ci illərdə Veneraya enmək üçün buraxılan Sovet istehsalı olan Kosmos 482 adlı kosmik gəminin gələn həftə Yerə nəzarətsiz eniş edəcəyi gözlənilir.
Elchi.az xəbər verir ki, təxminən 500 kiloqram ağırlığında olan kapsul buraxılış raketindəki nasazlıq səbəbindən orbitdən çıxa və missiyasını başa çatdıra bilməyib.
Kosmik zibil ekspertlərinin fikrincə, obyektin hara düşəcəyi və onun nə qədərinin atmosferdən keçərək sağ qalacağı hələlik məlum deyil.
53 il orbitdə
Hollandiyalı alim Marco Langbroek, kosmik kapsulun Yerə mayın 10-da daxil olacağını proqnozlaşdırır. Əgər obyekt toxunulmaz qalsa, Langbroekə görə, o, saatda təxminən 240 kilometr sürətlə yerə düşə bilər.
“Risk tamamilə yox deyil, lakin ciddi narahat olmağa ehtiyac yoxdur” dedi Langbroek. “Obyekt nisbətən kiçikdir. Atmosferdə tam yanmasa belə, bu hadisənin baş vermə riski ildə bir neçə dəfə baş verən meteoritlərə bənzəyir. İldırım vurma ehtimalı daha da yüksəkdir”.
Okeana düşmə ehtimalı yüksəkdir
Langbroek, kapsulun kiməsə və ya bir quruluşa dəymə ehtimalı son dərəcə aşağıdır, lakin “tamamilə istisna edilə bilməz” dedi. Kosmik gəmi 1972-ci ildə Sovet İttifaqı tərəfindən buraxılıb, lakin Veneraya çatana qədər Yer orbitində qalıb.
Onun hissələrinin çoxu illər ərzində Yerə düşsə də, enmə kapsulunun – diametri təxminən bir metr olan metal kürə – 53 il ərzində yüksək elliptik orbitdə dövr etdiyi və zamanla hündürlüyünü itirdiyi düşünülür.
İstilik qoruyucusu uğursuz olarsa, təhlükə arta bilər
Langbroekə görə, Veneranın sıx karbon dioksid atmosferinə tab gətirmək üçün hazırlanmış kapsul atmosferdən uğurla keçə bilirdi. Ancaq bu, riski artırır.
Harvard-Smithsonian Astrofizika Mərkəzindən Jonathan McDowell deyir ki, istilik qalxanının uğursuz olması daha yaxşı bir ssenaridir.
“İstilik qoruyucusu sıradan çıxsa, kapsul atmosferdə yanacaq. Amma mühafizə sistemi dayansa, göydən yarım tonluq metal obyekt düşmüş olacaq”.
Geniş bir əraziyə düşə bilər
Mütəxəssislərin fikrincə, kapsul şimalda London və Kanadanın Edmonton, cənubda isə Cənubi Amerikanın ucu Horn burnu arasında istənilən yerə enə bilər. Lakin Yer səthinin böyük hissəsi su ilə örtüldüyü üçün “onun okeana düşmə ehtimalı kifayət qədər yüksəkdir”.
2022-ci ildə Çin raketi, 2018-ci ildə isə Çinin “Tiangong-1” kosmik stansiyası Yer atmosferinə nəzarətsiz daxil olub və okeana düşüb.
Şayəstə Hüseynova
