Çin və ABŞ arasında ticarət müharibəsi səngimək bilmir, bütün gözlər bu həftə sonu keçiriləcək görüşə yönəlib.
Dünyanın iki böyük iqtisadiyyatı arasındakı ticarət müharibələri bütün gərginliyi ilə davam edərkən, onların qlobal bazarlara təsiri də gündəmi sarsıdır. Həftə sonu iki ölkə arasında kritik danışıqlar aparılacaq.
Elchi.az xəbər verir ki, ABŞ prezidenti Tramp Oval Ofisdə keçirilən imza mərasimində ABŞ-Çin ticarət danışıqları ilə bağlı açıqlama verib.
Onun sözlərinə görə, 2 ölkə arasında anlaşma mümkündür: “Düşünürəm ki, Çinlə ədalətli bir razılaşma ilə qayıdacağıq”.
Amerika Prezidenti bu həftə İsveçrədə ABŞ və Çin arasında keçiriləcək məsləhətləşmələri də şərh edib.
Tramp qeyd edib ki, danışıqlar uğursuz olsa da, ticarət əlaqələrinin yaxşılaşmasına səbəb olacaq.
ABŞ-ın maliyyə naziri Skott Bessent və ABŞ-ın ticarət nümayəndəsi Ceymison Qri həftə sonu İsveçrədə Çindən olan nümayəndələrlə görüşəcək.
İsveçrədəki görüş Trampın Çin mallarına 145 faiz rüsum tətbiq etməsindən sonra iki ölkə arasında ilk rəsmi üz-üzə təmas olacaq.
Nuranə Məmmədova
