Fələstin prezidenti Mahmud Abbas Fələstin xalqını öz torpaqlarından zorla çıxarmaq çağırışlarını və planlarını bir daha rədd edib.
Elchi.az xəbər verir ki, Fələstinin rəsmi xəbər agentliyi WAFA-nın məlumatına görə, Abbas Fransa prezidenti Emmanuel Makronla telefon danışığı aparıb.
Görüşdə Fələstin xalqının məcburi köçkünlüyünün rədd edilməsi, təcili humanitar yardımın çatdırılması, Qəzza zolağında atəşkəsin möhkəmləndirilməsi, Fələstin Administrasiyasının Qəzzəyə nəzarəti ələ keçirməsi və Qəzzanın yenidən qurulması vurğulanıb.
Abbas Fələstin xalqının köçkünlüyünə qarşı ölkəsinin mövqeyinə və iki dövlət həllinə verdiyi dəstəyə görə Makrona təşəkkür edib və Fransanın Səudiyyə Ərəbistanı ilə birlikdə beynəlxalq sülh konfransının təşkilində iştirakının, Fələstin Dövlətinin beynəlxalq səviyyədə tanınması və BMT-də tamhüquqlu üzv olmasının vacibliyini vurğulayıb.
Dünən Efiopiyanın paytaxtı Əddis-Əbəbədə keçirilən Afrika İttifaqının 38-ci Sammitində Baş Assambleyada çıxış edən Abbas, “Əsrin yeni sazişini qəbul etməyə və ya xalqımızı yerindən tərpətməyə inananlar aldanıblar” demişdi.
Səudiyyə Ərəbistanının Əl-Ərəbiyyə kanalının məlumatına görə, iyunda Fələstin probleminin həlli üzrə beynəlxalq konfransa Ər-Riyad və Paris sədrlik edəcək.
ABŞ prezidenti Donald Tramp fevralın 4-də Ağ Evdə İsrailin baş naziri Benyamin Netanyahu ilə birgə mətbuat konfransında ABŞ-ın Qəzza zolağının nəzarətinə keçəcəyini bildirib.
Qəzzanın artıq tam bir məhv bölgəsi olduğunu qeyd edən Tramp, Qəzzadakı fələstinlilərin qonşu ölkələrdə, xüsusilə Misir və İordaniyada tikiləcək yeni qəsəbələrə getmələrinin çox daha yaxşı olacağını müdafiə etdi.
Tramp həmçinin fələstinlilərin Qəzzanı tərk etməkdən başqa çarələrinin olmadığını iddia edib.
Şayəstə Hüseynova
