Human Rights Watch (HRW) bu həftə Macarıstana səfər edəcəyi gözlənilən İsrailin baş naziri Benyamin Netanyahunun Macarıstanda həbsini tələb edib.
Elchi.az xəbər verir ki, Nyu-Yorkda yerləşən HRW-nin bəyanatında Beynəlxalq Cinayət Məhkəməsinin (ICC) Netanyahuya qarşı 2024-cü ilin noyabrında verdiyi həbs qərarına istinad edilib.
Bəyanatda Macarıstandan Netanyahunun ölkəyə girəcəyi təqdirdə həbs edilməsi çağırışı edilib və “Macarıstan İsrailin baş naziri Netanyahunun ölkəyə girməsinə mane olmalı və ya ölkəyə daxil olarsa onu həbs etməlidir”,- ifadələri işlədilib.
Bəyanatda “ICC-nin üzvü” olan Macarıstanın ərazisinə daxil olan şübhəlilərin tutulması və ekstradisiyasında “əməkdaşlıq etmək məcburiyyətində” olduğuna diqqət çəkilib və əlavə edilib: “Öz polis qüvvəsinə malik olmayan BCM həbslər etmək üçün dövlətlərə güvənir”.
2024-cü ilin noyabrında həbs qərarı verildikdən sonra Macarıstan lideri Viktor Orban Netanyahunu dəvət edəcəyini və “gələcəyi təqdirdə əmrin Macarıstanda heç bir təsiri olmayacağına zəmanət verəcək” dedi.
Orbanın Kommunikasiya Ofisindən verilən açıqlamada Netanyahunun Baş nazir Orbanın dəvəti ilə 2-6 aprel tarixləri arasında Macarıstana rəsmi səfər edəcəyi bildirilib.
BCM-ə üzv olan ölkələr həbs etməyə borcludurlar
BCM 21 noyabr 2024-cü il tarixində elan etdiyi qərarda İsrailin baş naziri Netanyahu və keçmiş müdafiə naziri Gallantı “Qəzzada törədilən müharibə cinayətləri və insanlığa qarşı cinayətlərə görə” həbsə order verdiyini açıqlayıb.
BCM tərəfindən verilən həbs orderlərinin icrası məhkəmənin təsis müqaviləsi olan Roma Statutunun 86 və 87-ci maddələrinə uyğun olaraq tərəf dövlətlərin öhdəliyidir.
Nizamnamənin 89-cu maddəsinə əsasən, Netanyahu və Gallant BCM-nin iştirakçısı olan hər hansı ölkəyə səfər edərlərsə, həmin ölkənin hakimiyyət orqanları onları həbs edib Haaqa məhkəməsinə təhvil verməlidir.
Bildirilir ki, Netanyahu və Gallant həmçinin Avropa Birliyinin bütün üzv dövlətlərinə, həmçinin Yaponiya, Kanada, Meksika, Avstraliya, Yeni Zelandiya, Böyük Britaniya, demək olar ki, bütün Mərkəzi və Cənubi Amerika ölkələri və Afrika ölkələrinin əksəriyyəti daxil olmaqla BCC-nin 124 üzv dövlətinə səyahət etməkdən çəkinməli ola bilər.
Nuranə Məmmədova
