İsrailin Suriyaya 9 nəfərin ölümü ilə nəticələnən hücumlarının artmasına HƏMAS reaksiya verib.
Elchi.az xəbər verir ki, HƏMAS yazılı açıqlamada İsrailin Suriya ərazisinə davam edən hücumları kəskin şəkildə pisləyib. Açıqlamada son saatlarda artan hava hücumlarının Dəməşq, Dəraa, Həma və Homs kənd ərazilərini hədəfə aldığı və İsrail tanklarının Dəraa kəndlərinə girməsi nəticəsində itkilərin baş verdiyi qeyd edilib.
HƏMAS-ın bəyanatında İsrailin irəliləyişlərinə müqavimət göstərən Dəra xalqının müqaviməti yüksək qiymətləndirilib və bildirilib ki, “İsrailin hücumları İsrailin baş naziri Binyamin Netanyahunun rəhbərlik etdiyi hökumətin yürütdüyü tiranlıq və təkəbbür siyasətinin bir hissəsidir ”.
Bəyanatda İsrailin Suriyaya hücumlarının Qəzza zolağı, işğal altındakı İordan çayının qərb sahili və Qüdsdə Fələstin xalqına qarşı hücumlarının davamı olduğu, İsrailin soyqırım, blokada, aclıq siyasəti və məcburi köçlərini davam etdirdiyi vurğulanıb.
Bəyanatda İsrailin işğalı və təcavüzkar planlarına qarşı milli, regional və İslam ölkələri səviyyəsində səylərin birləşdirilməsi və ortaq mövqe nümayiş etdirilməsi çağırışı edilməklə yanaşı, işğala qarşı hər cür müqavimət vasitəsinin istifadə edilməli olduğu, işğalın torpaqlardan və müqəddəs yerlərdən tamamilə qoparılmasına qədər mübarizə aparılmalı olduğu vurğulanıb.
Dünən axşam saatlarında İsrail Həma hava limanı və onun ətraf ərazilərinə 14-dən çox hava hücumu, həmçinin Homs vilayətindəki T4 Hərbi Hava Limanına və paytaxt Dəməşqdəki hərbi infrastruktura, Dəra vilayətinin qərbinə minaatan və artilleriya hücumları təşkil edib.
Suriya xəbər agentliyi SANA-nın məlumatına görə, dünən İsrailin Suriyanın cənubundakı Dəra əyalətinə hücumları nəticəsində 9 mülki vətəndaşın öldüyü, çoxlu sayda yaralının olduğu bildirilib.
Nuranə Məmmədova
