Avstraliyalı alimlər Antarktika qitəsinin şərqində apardıqları araşdırmalar zamanı elm aləmində yeni ola biləcək dəniz növlərinin nümunələrini topladıqlarını bildiriblər.
Elchi.az xəbər verir ki, “ABC News” telekanalının məlumatına görə, RSV Nuyina buzqıran gəmisi ilə Antarktika qitəsinin şərqinə 60 günlük səyahətə çıxan tədqiqatçılar, Avstraliyanın Antarktika Proqramı (APP) daxil olmaqla, 4 elmi qurumla əməkdaşlıq edərək, dəniz elminə yönəlmiş missiyanın bir hissəsini tamamlayıblar.
Şərqi Antarktidadakı Denman buzlaqına isti suların təsirini araşdıran tədqiqatçılar Cənubi Okeandan topladıqları yeni biomüxtəliflik nümunələrini də təhlil ediblər.
Tədqiqatçılar misal kimi elm aləmində artıq məlum olan bəzi növlərin, məsələn, dəniz xiyarının bir növü olan “dəniz donuzu”, dəniz dibində yaşayan kiçik xərçəngkimilər olan izopodların və suda üzərkən qanadlarını çırpan kimi görünən “dəniz kəpənəyi” adlı dəniz ilbizinin olduğunu ifadə ediblər. Onlar həmçinin misli görünməmiş canlı növləri ilə, o cümlədən “əl boyu” dəniz hörümçəkləri, yemək qabı ölçüsünə çatan dəniz ulduzları və bölgəyə endemik olan müxtəlif ahtapot növləri ilə də rastlaşdıqlarını qeyd ediblər.
Tədqiqatçılar topladıqları dəniz kəpənəyi gəmidəki akvariumlardan birində yumurta qoyarkən ilk dəfə olaraq “pteropod” yumurtalarının inkişafını sənədləşdirmək fürsəti əldə etdiklərini bildiriblər.
Araşdırma qrupundan olan alim qeyd edib: “Komanda bu balaca məxluqu müşahidə etməkdən və ona qayğı göstərməkdən çox həyəcanlanır, çünki biz onun indiyədək gizli qalan bütün sirlərini bizə söyləməsini gözləyirik”.
Təxminən 4 min kilometrlik bu səyahət zamanı ən sürətli əriyən buzlaqlardan biri olan Denman Buzlağından götürülmüş nümunələri araşdırdıqlarını, müxtəlif dərinliklərdə suyun istiliyi, duzluluğu və oksigen səviyyələrini təhlil etdiklərini bildirən alim deyib ki, buz kütləsinin son iyirmi ildə 5 kilometr geri çəkildiyi müəyyən edilib.
“Okeana daxil olan istiliyin miqdarını həqiqətən dərk etmək üçün bu prosesləri və okeanın xüsusiyyətlərini anlamaq üçün buzlağa mümkün qədər yaxın olmalıyıq”, – deyə alim vurğulayıb.
Sistemin dəyişdiyini vurğulayan alim deyib: “Bu dəyişikliyi müşahidə etməyimiz çox vacibdir ki, iqlim modellərimizi daim sınaqdan keçirə və bunlara əsaslanaraq qarşısının alınması və uyğunlaşma strategiyaları inkişaf etdirə bilək”.
Fevral ayında yola çıxan tədqiqat qrupunun mayın əvvəlində Avstraliyanın Hobart şəhərinə qayıtması planlaşdırılır.
Yeganə
