Beynəlxalq kredit reytinqi agentliyi “Fitch Ratings” Çinin kredit reytinqini aşağı salıb. Çinin kredit reytinqi “A+”-dan “A”ya endirilib, reytinq üzrə proqnoz isə “stabil” səviyyəsində müəyyən edilib.
Elchi.az xəbər verir ki, “Fitch” açıqlamasında Çinin kredit reytinqinin dövlət maliyyəsinin zəifləməyə davam edəcəyi və borcların sürətlə artacağı gözləntiləri ilə aşağı salındığını bildirib.
Açıqlamada Çinin kredit reytinqinin “A+” səviyyəsindən “A” səviyyəsinə endirildiyi və reytinq üzrə proqnozun “stabil” olaraq təyin edildiyi bildirilib. Fitch-in bəyanatında deyilir ki, reytinqin aşağı salınması Çinin dövlət maliyyəsinin zəifləməyə davam edəcəyi və dövlət borcunun sürətlə artacağı ilə bağlı gözləntilərimizi əks etdirir.
Bəyanatda Çin hökumətinin durğun daxili tələb, artan tariflər və deflyasiya təzyiqləri səbəbindən böyüməni dəstəkləmək üçün davamlı fiskal stimul tətbiq etdiyi və bu təşviqlərin, gəlir bazasının struktur aşınması ilə birlikdə, böyük ehtimalla, maliyyə kəsirlərini yüksək tutacağı qeyd edilib.
“Çin ixrac bazarlarını şaxələndirdiyi üçün Prezident Trampın ilk dövründə olduğundan birbaşa ABŞ tariflərinə daha davamlı görünür. Buna baxmayaraq, tarif artımları daha kəskin olub və Çin tariflərinin səbəb olduğu daha geniş qlobal yavaşlamadan təsirlənməyə davam edəcək”, – bəyanatda deyilir.
Çin Maliyyə Nazirliyi açıqlamasında Fitch-in ölkənin kredit reytinqini aşağı salmasının “qərəzli” olduğunu iddia edib.
“Çində real vəziyyət tam və obyektiv şəkildə əks olunmur, biz dərin təəssüf hissi keçiririk”, – bəyanatda deyilir.
Fitch Çin iqtisadiyyatının keçən il 5 faiz artımından sonra bu il 4,4 faiz artacağını gözləyir. Çinin ümumi hökumət büdcə kəsirinin də 2024-cü ildə ÜDM-in 6,5 faizindən 2025-ci ildə 8,4 faizə yüksələcəyi proqnozlaşdırılır.
Nuranə Məmmədova
