Ukraynaya veriləcək təhlükəsizlik zəmanətləri və bu ölkədə qalıcı sülhün əldə edilməsi kimi məsələlərin müzakirəsi üçün paytaxt Londonda yerli vaxtla saat 14:00-da başlayan və Böyük Britaniyanın ev sahibliyi ilə keçirilən sammit başa çatıb.
Elchi.az xəbər verir ki, Böyük Britaniya Xarici İşlər Nazirliyinin tarixi Lancaster House kampusunda keçirilən və əsas gündəliyi Ukraynada davamlı sülh və Avropa təhlükəsizliyi olan sammitə Ukrayna, Fransa, Almaniya, Danimarka, İtaliya, Hollandiya, Norveç, Polşa, İspaniya, Türkiyə, Finlandiya, İsveç, Çexiya və Rumıniyadan dövlət liderləri və nazirlər qatılıb.
İştirakçılar arasında NATO baş katibi Mark Rutte, Avropa İttifaqı (Aİ) Komissiyasının sədri Ursula von der Leyen, Avropa İttifaqı Şurasının sədri Antonio Kosta və Avropa xaricindən Kanadanın baş naziri Castin Trudeau, prezident Rəcəb Tayyib Ərdoğan adından isə xarici işlər naziri Hakan Fidan iştirak edib.
ABŞ prezidenti Donald Tramp və Ukrayna prezidenti Vladimir Zelenski arasında fevralın 28-də Vaşinqtonda keçirilən müzakirədən sonra sammit keçirilib və görüşdə iştirak edən bəzi nümayəndələrin verdiyi açıqlamalara görə, ABŞ-ın Ukraynaya dəstəyi və ölkəyə təhlükəsizlik zəmanətlərinin verilməsində onun üzərinə götürəcəyi rol da müzakirə olunub.
İştirakçılar həmçinin Rusiyanın gələcək hücumlarına qarşı çəkindirici rol oynayacaq tədbirləri də müzakirə ediblər.
Von der Leyen bildirib ki, o, Avropanın yenidən silahlanması məsələsini də görüş iştirakçılarına çatdırıb.
Şayəstə Hüseynova
