RİA Novosti: Türkiyə və Böyük Britaniya xarici işlər nazirləri Münhendə Ukrayna məsələsini müzakirə ediblər.
Elchi.az xəbər verir ki, Türkiyənin xarici işlər naziri Hakan Fidan və Böyük Britaniyanın xarici işlər naziri Devid Lammi Münhen Təhlükəsizlik Konfransı çərçivəsində Ukraynadakı vəziyyətin tənzimlənməsini müzakirə ediblər. Bu barədə RİA Novosti Türkiyə diplomatik departamentindəki mənbəyə istinadən xəbər verir.
Tərəflər Suriyadakı vəziyyəti və Qəzzadakı hadisələri də müzakirə ediblər.
“Nazir Fidan Suriyanın siyasi birliyinin vacibliyini vurğulayıb və Suriyada yeni administrasiyanın dəstəklənməli olduğunu bildirib”, – mənbə bildirib.
O, həmçinin qeyd edib ki, Yaxın Şərq regionunda sülhün bərqərar olması üçün Qəzzada atəşkəs daimi xarakter almalıdır.
Türkiyə prezidenti Rəcəb Tayyib Ərdoğan daha əvvəl demişdi ki, ABŞ Yaxın Şərqlə bağlı yanlış hesablama aparır və ABŞ-ın bundan heç bir qazancı yoxdur. Fevralın 4-də ABŞ prezidenti Donald Tramp fələstinlilərin oradan qonşu ölkələrə köçürülməsindən sonra Qəzza zolağına nəzarəti ələ keçirmək niyyətində olduğunu açıqlayıb.
Şayəstə Hüseynova
