Yeni araşdırmalar göstərib ki, dünyadakı dağ silsilələrində təbii hidrogen qazının böyük ehtiyatları ola bilər. Alimlər deyirlər ki, bu kəşf təmiz enerji sahəsində inqilab yarada bilər.
Elchi.az xəbər verir ki, Almaniyanın GFZ Helmholtz Yer Elmləri Mərkəzinin alimlərinin də daxil olduğu beynəlxalq komanda qitə hərəkətlərini, dağların qurulması proseslərini və hidrogen istehsalını simulyasiya etmək üçün sahə müşahidələrini kompüter modelləri ilə birləşdirdi.
Araşdırmalara görə, bu təbii hidrogen ehtiyatları yer qabığının altındakı mantiyanın su ilə qarşılıqlı əlaqədə olduğu “serpentinləşmə” adlı proses nəticəsində əmələ gəlir.
Bu kimyəvi reaksiya qitələrin ayrılması və ya toqquşması zamanı mantiya yuxarıya doğru itələndikdə baş verir.
Tədqiqatçılar müəyyən ediblər ki, bu proses qitələrin bir-birinə daha çox yaxınlaşdığı dağ qurşaqlarında qitələrin ayrıldığı bölgələrə nisbətən 20 dəfə daha tez baş verir.
Bu, təmiz enerji üçün yeni bir dövr ola bilər
Tədqiqat dünya üzrə hidrogenin miqdarı ilə bağlı dəqiq təxminlər verməsə də, Şərqi Pireneydə aparılan araşdırmalar göstərdi ki, bu bölgədəki hidrogen ehtiyatları yarım milyon insanın illik enerji ehtiyacını ödəməyə kifayət edə bilər.
Alimlər hidrogenin davamlı çıxarılması və istifadəsi ilə bağlı daha çox araşdırmaya ehtiyac olduğunu vurğulasalar da, bu kəşfin təmiz enerji sahəsində böyük bir addım ola biləcəyini bildirirlər.
Araşdırma “Science Advances” jurnalında dərc olunub.
Şayəstə Hüseynova
