ABŞ Aeronavtika və Kosmik Tədqiqatlar İdarəsinə (NASA) məxsus Ceyms Uebb Kosmik Teleskopu Yerdən yüzlərlə işıq ili uzaqlıqda yerləşən planetin atmosferində həyatla əlaqəli ola biləcək kimyəvi maddələrin izlərini aşkar edib.
Elchi.az xəbər verir ki, İngiltərənin Kembric Universitetinin alimləri Günəşdən başqa bir ulduzun ətrafında dövr edən K2-18b adlı planetin atmosferini tədqiq ediblər.
Tapıntılar Yer üzündə yalnız sadə orqanizmlər tərəfindən istehsal olunan molekulların mövcud olduğunu göstərir.
Oxşar kimyəvi izlər əvvəllər də aşkar edilib, lakin bu dəfə müşahidələr daha güclü siqnallar ehtiva edir.
Bununla belə, tədqiqatçılar vurğulayırlar ki, sözügedən məlumat hələ yekun deyil və əlavə araşdırma tələb edir.
“Həyat izləri üçün ən güclü dəlil”
Tədqiqat qrupunun rəhbəri, professor Nikku Madhusudhan BBC-yə deyib: “Bu, kainatda həyatın ola biləcəyinə dair əlimizdə olan ən güclü sübutdur. Düşünürük ki, bu siqnalı bir-iki il ərzində təsdiqləyə bilərik”.
Planet K2-18b Yerdən təxminən 2,5 dəfə böyükdür və təxminən 700 trilyon mil məsafədə yerləşir. James Webb Teleskopu planetin atmosferindən keçən işığı analiz edərək onun kimyəvi tərkibi haqqında məlumat verə bilir.
Kembric Universitetinin tədqiqatçıları atmosferdə həyatla əlaqəli iki molekuldan birinin və ya hər ikisinin varlığının əlamətlərini aşkar ediblər: dimetil sulfid (DMS) və dimetil disulfidin (DMDS). Yer üzündə bu qazlar fitoplankton və ümumiyyətlə dənizdə yaşayan bakteriyalar tərəfindən istehsal olunur.
Professor Madhusudhan qeyd edib ki, müşahidə pəncərəsi kifayət qədər qısa olsa da, onlar təəccüblü dərəcədə yüksək qaz səviyyəsini aşkar ediblər. “Atmosferdəki bu qazın miqdarı Yerdəkindən minlərlə dəfə çox ola bilər. Əgər bu, həqiqətən də bioloji mənşəlidirsə, bu planet həyatla doludur” deyib.
Şayəstə Hüseynova
