Almaniya kansleri Olaf Şolts Rusiya prezidenti Vladimir Putinlə Ukraynadakı münaqişənin həllini müzakirə etməyə hazır olduğunu açıqlayıb.
Elchi.az xəbər verir ki, bu barədə TASS məlumat yayıb .
Almaniya hökumətinin başçısı Bundestaqda çıxışı zamanı Rusiyanın iştirakı ilə Ukrayna ilə bağlı konfransın keçirilməsinin tərəfdarı olduğunu bildirib.
“Bu baxımdan, düzgündür ki, bizdən Rusiya prezidenti ilə danışıb-danışmayacağımızı soruşduqda, bəli cavabı veririk və bu belədir”, – Şolts deyib.
Eyni zamanda, Almaniya kansleri sülhə nail olmaq üçün səylərdə aydın prinsiplərin olduğunu vurğulayıb. Xüsusilə, mümkün qərarlar “Ukraynanın arxasında” və ya “tərəfdaşlarla razılaşmadan” qəbul edilə bilməz.
Xatırladaq ki, iyun ayında Putin Ukraynadakı münaqişənin sülh yolu ilə həlli üçün təşəbbüslərlə çıxış edib. O qeyd edib ki, Moskva Ukrayna qoşunları Rusiyanın yeni regionlarının ərazisindən çıxarıldıqdan sonra dərhal atəşi dayandıracaq və danışıqlara hazır olduğunu bəyan edəcək. Həmçinin, Kiyev NATO-ya daxil olmaq niyyətindən əl çəkməli, demilitarizasiya və denazifikasiya həyata keçirməli və nüvəsiz statusu qəbul etməli olacaq. Bundan əlavə, Rusiyaya qarşı sanksiyalar aradan qaldırılmalıdır.
Ukrayna qoşunlarının Kursk vilayətinə müdaxiləsindən sonra Putin mülki şəxslərə, mülki infrastruktura hücum edən və ya nüvə enerjisi obyektlərinə təhlükə yaratmağa çalışanlarla danışıqların aparılmasını qeyri-mümkün adlandırıb. Prezidentin köməkçisi Yuri Uşakov qeyd edib ki, Rusiya liderinin əvvəllər səsləndirdiyi təkliflər ləğv edilməyib, lakin indiki mərhələdə Moskva Kiyevlə danışmayacaq.
Nuranə Məmmədova
