Peskov Londonda Ukrayna və ABŞ nümayəndə heyətlərinin görüşünün pozulmasının səbəbini açıqlayıb.
Elchi.az xəbər verir ki, Ukrayna və ABŞ nümayəndə heyətlərinin London görüşü baş tutmayıb, çünki tərəflər Ukrayna münaqişəsinin həlli ilə bağlı konsensus əldə edə bilməyiblər. Bunu jurnalistlərlə keçirdiyi brifinqdə Rusiya prezidentinin mətbuat katibi Dmitri Peskov deyib.
“Anladığımız qədər bəzi məsələlərdə mövqeləri yaxınlaşdırmaq hələ mümkün olmayıb və ona görə də bu görüş indi baş tutmayıb”, – Kreml sözçüsü bildirib.
Londonda Ukrayna münaqişəsinin nizamlanması üzrə danışıqlar aprelin 23-də Ukrayna nümayəndə heyəti, Fransa və Almaniya Xarici İşlər nazirliklərinin nümayəndələri, həmçinin ABŞ dövlət katibi Keyt Kelloqun iştirakı ilə baş tutmalı idi.
Bildirilib ki, Ukrayna nümayəndə heyəti artıq Londona yollanır və istənilən formatda işləməyə hazırdır. Lakin danışıqlar heç vaxt baş tutmayıb.
Əvvəlcə görüşdə ABŞ dövlət katibi Marko Rubio da iştirak etməli idi, lakin o, Ukrayna prezidenti Vladimir Zelenskinin Krımla bağlı mövqeyinə görə Londona getməkdən imtina edib.
Vaşinqton Kiyevə təklif edib ki, sülhə nail olmaq üçün tədbirlərdən biri də yarımadanın Rusiya kimi tanınmasıdır. Buna Zelenski cavab verib ki, Ukrayna “Krımın işğalını” hüquqi cəhətdən tanımır və belə bir razılaşma ilə razılaşmayacaq.
Şayəstə Hüseynova
