İqlim dəyişikliyinin yalnız Yerdəki həyata təsir etdiyi düşünülsə də, yeni araşdırmalar bunun kosmosda da ciddi nəticələri ola biləcəyini ortaya qoyur. Alimlərin fikrincə, atmosferdə artan karbon qazı (CO₂) səviyyəsi aşağı Yer orbitində peyklərin hərəkətini dəyişdirərək toqquşma riskini artırır.
Elchi.az xəbər verir ki, Birmingem Universitetinin araşdırmasına görə, istixana qazları atmosferin aşağı hissəsindəki istiliyi tutaraq, atmosferin yuxarı təbəqələrinin soyumasına və büzülməsinə səbəb olur. Normalda atmosferin sıxlığı köhnə peykləri orbitdən çıxararaq kosmik zibilləri azaldır. Lakin atmosfer nazikləşdikcə peyklərin orbitdə keçirdikləri vaxt artır və toqquşma ehtimalı artır.
Hazırda dəniz səviyyəsindən 300 ilə 1000 kilometr arasında olan aşağı Yer orbitində 8000-dən çox peyk var. Alimlər vurğulayırlar ki, kosmik hava hadisələri qısa müddətdə atmosferin sıxlığını dəyişə bilər, lakin iqlim dəyişikliyi uzunmüddətli təsirə malikdir.
Peyklərin toqquşması və kosmik dağıntı riski
Atmosferin sıxlığı azaldıqca peyklərə təsir edən sürtünmə qüvvəsi də azalır. Normal şəraitdə atmosfer sürtünməsi istifadə olunmayan peyklərin zamanla orbitdən çıxmasına səbəb olur. Lakin atmosferin incəlməsi ilə peyklər orbitdə daha uzun müddət qalır.
Bu, köhnə peyklərin yeniləri ilə toqquşması riskini artırır və kosmik zibil problemini daha da artırır. Kosmik tullantıların artması həm də yeni peyklərin buraxılmasını riskli edir və rabitə, hava proqnozu və naviqasiya sistemlərini təhdid edir.
Şayəstə Hüseynova
