Oreqon sahillərində kəşf edilən yeni elektrik keçirici bakteriya növü ətraf mühitin təmizlənməsindən bioelektronikaya qədər sahələrdə inqilab etmək potensialına malikdir.
Elchi.az xəbər verir ki, ABŞ-ın Oreqon sahillərində palçıqlıqlarda əvvəllər məlum olmayan bakteriya növü aşkar edilib. Candidatus Electrotrix yaqonensis adlanan bu bakteriya elektrik cərəyanını keçirmə qabiliyyətinə malikdir.
Kəşf edən Oreqon Dövlət Universitetindən Cheng Li və professor Clare Reimers, bu bakteriyanın elektrik cərəyanını naqil kimi keçirə biləcəyini ifadə etdilər. Hüceyrələri uzun saplar əmələ gətirmək üçün bir-birinə bağlanan bakteriyalar, nikellə zəngin keçirici lifləri sayəsində elektronları uzun məsafələrə daşıya bilirlər.
Yeni növ digər tanınmış kabel bakteriya cinslərinə bənzəyir, Ca. Elektrotrix və Ca. Electronema-nın genetik xüsusiyyətlərini daşıyır. Bu, bakteriyaların bu iki növ arasında təkamül körpüsü ola biləcəyini göstərir. Həmçinin onun səthində digər növlərə nisbətən üç dəfə çox qabarıq silsilələr var.
Bakteriyaların elektron daşıma qabiliyyəti o deməkdir ki, o, çirklənmiş çöküntülərdən zərərli maddələrin çıxarılması kimi ekoloji tətbiqlərdə istifadə edilə bilər. Eyni zamanda, bu bakteriyada tapılan yüksək keçirici nikel örtüklü zülallar yeni nəsil bioelektronik cihazların dizaynına ilham verə bilər.
Bakteriyalara verilən “yaqonensis” adı, kəşf edildiyi ərazinin yerli əhalisi olan Yaqona icmasını şərəfləndirir. Bu gün bu icmanın nəsilləri Siletz Qəbilələri Konfederasiyasının tərkibində yaşayırlar.
Şayəstə Hüseynova
