Beynəlxalq aviaşirkətlər mayın 4-də Yəməndə İranın dəstəklədiyi husilərin soyqırım törətmiş İsrailin Ben Qurion hava limanına ballistik raket zərbəsi endirməsindən sonra Təl-Əvivə uçuşları dayandırdıqlarını açıqlayıb.
Elchi.az xəbər verir ki, İsrailin Calcalist saytının məlumatına görə, Lufthansa Group hava yolları Eurowings, İsveçrə, Avstriya Hava Yolları və Brüssel Hava Yolları Təl-Əvivə uçuşların dayandırılması tarixini mayın 11-nə qədər yeniləyib.
İtalyan Hava Yolları (ITA) uçuşların dayandırılmasının mayın 11-dək, Amerikanın United Airlines aviaşirkətinin mayın 9-dək, Macarıstanın Wizz Air aviaşirkətinin isə mayın 8-dək uzadıldığını açıqlayıb.
Aegean Airlines (Yunanıstan), British Airways (Böyük Britaniya), Delta Air Lines (ABŞ) və Ryanair (İrlandiya) İsrailə uçuşların qadağanını mayın 6-dək uzadıb.
Bu arada İsrailin “Yediot Ahronot” qəzeti hava yollarının İsrailə uçuşları dayandırmasından sonra minlərlə israillinin xaricdə qapalı vəziyyətdə qaldığını bildirib.
Mayın 4-də Yəməndəki husilər ballistik raketlə Tel-Əvivdəki Ben Qurion hava limanını vurmuşdu.
Hücumdan sonra limanda təyyarələrin eniş və qalxması dayandırılıb və raketin düşdüyü ərazidə 15 metr enində kraterin əmələ gəldiyi bildirilib.
Həmin gün husilər İsrailə qarşı hərtərəfli hava blokadası tətbiq edəcəklərini açıqlayıb və beynəlxalq hava yollarını İsrailə uçuşları ləğv etməyə çağırıblar.
İsrail mayın 5-də Yəmənin qərbində Hudeyda limanına və Bacil sement zavoduna hücum edib.
Husilər hücumlarda 2 nəfərin öldüyünü, 42 nəfərin yaralandığını açıqlayıb.
Şayəstə Hüseynova
