“Bitki sağlamlığı haqqında” qanun layihəsinin bu ilin sonuna qədər aidiyyəti dövlət qurumları ilə razılaşdırılaraq Milli Məclisə təqdim edilməsi gözlənilir.
Bunu Elchi.az – a açıqlamasında Azərbaycan Qida Təhlükəsizliyi Agentliyinin (AQTA) sədrinin müşaviri Elxan Mikayılov bildirib.
Onun sözlərinə görə, layihə ilk öncə Nazirlər Kabinetinə və Prezident Adminstrasiyasına təqdim ediləcək, daha sonra Milli Məclisə göndəriləcək.
“Sənəd “Azərbaycan Meyvə-Tərəvəz İstehsalçıları və İxracatçıları Assosiasiyası”, eləcə də “Azərbaycan Gübrə İstehsalçıları və İdxalçıları Assosiasiyası” İctimai Birlikləri ilə birgə ictimai müzakirələrdən keçib. Müzakirələr zamanı bir sıra təkliflər irəli sürülüb və onların nəzərə alınması planlaşdırılır. Məsələn, bitki mühafizə vasitələrinin birbaşa istehsalçılardan alınması təklif edilib. Eyni zamanda, utilizasiya ilə bağlı redaksiya dəyişikliklərinin və təkmilləşdirmələrin aparılması da təkliflər sırasında yer alır. Bununla yanaşı, bitki mühafizə vasitələrinin məsləhətçilərinin yalnız ali təhsilli olması təklif edilir. Bu və digər təkliflər arasında məqsədəuyğun hesab edilənlərin qanun layihəsində əks olunması nəzərdən keçirilir”, – deyə AQTA rəsmisi əlavə edib.
O, əlavə edib ki, yeni qanun layihəsi bitki sağlamlığı sahəsində hərtərəfli yanaşma təklif edir.
Xatırladaq ki, bu qanun qəbul edilsə, Azərbaycan ərazisində bitki sağlamlığının təmin edilməsi məqsədilə həyata keçirilən fitosanitar nəzarət və fitosanitar xidmət fəaliyyətlərinin təşkili və həyata keçirilməsinin hüquqi əsaslarını müəyyən edəcək, fitosanitar nəzarət və xidmət sahəsində fəaliyyət göstərən subyektlər arasındakı münasibətləri tənzimləyəcək. Sənədə əsasən, zərbaycan ərazisində bitki mühafizəsi vasitələrinin istehsalına, idxalına, dövriyyəsinə və istifadəsinə həmin məhsullar dövlət qeydiyyatına alındıqdan sonra icazə veriləcək. Ölkədə dövlət qeydiyyatına alınmamış bitki mühafizə vasitələrinin idxalı, istehsalı, dövriyyəsi və istifadəsi qadağan olunacaq.
