ABŞ-ın 12 ştatı prezident Donald Tramp administrasiyasının tətbiq etdiyi yüksək tarifləri dayandırmaq üçün məhkəməyə müraciət edib.
Elchi.az xəbər verir ki, CNN-in məlumatına görə, Arizona, Kolorado, Konnektikut, Delaver, İllinoys, Men, Minnesota, Nevada, Nyu Meksiko, Nyu-York, Oreqon və Vermont ştatları yüksək tarifləri ləğv etmək üçün qanuni addımlar atıb.
ABŞ-ın Nyu Yorkdakı Beynəlxalq Ticarət Məhkəməsində açılan iddiada ştatlar, Tramp administrasiyasının yüksək tarif siyasətlərinin qeyri-qanuni olduğunu və bu tətbiqlərin Amerika iqtisadiyyatına xaos gətirdiyini iddia edir.
Gömrük vergilərinin amerikalılara qeyri-qanuni tətbiq edildiyini iddia edən petisiyada Tramp administrasiyasının “konstitusiya quruluşunu alt-üst etdiyi” iddia edilib və “gömrük vergisi” praktikasına son qoyulması tələb edilib.
Nyu York Baş prokuroru Letitia James açıqlamasında, “Donald Tramp qiymətləri aşağı salmağa və yaşayış minimumunu aşağı salmağa söz verdi, lakin bu qeyri-qanuni tariflər Amerika ailələrinə əks təsir göstərəcək” dedi.
Ceyms tariflərin qeyri-qanuni olduğunu və dayandırılmadığı təqdirdə daha çox inflyasiya, işsizlik və iqtisadi ziyana səbəb olacağını söylədi.
Kaliforniya ştatı keçən həftə Tramp administrasiyasına qarşı məhkəmə iddiası qaldıraraq, administrasiyanın tarifləri tətbiq etmək səlahiyyətinin olmadığını və bu vergilərin Kaliforniyaya düzəlməz ziyan vuracağını iddia etmişdi.
Nyu-Yorkdakı ABŞ Beynəlxalq Ticarət Məhkəməsində qaldırılan iddia, eyni zamanda bu ayın əvvəlində dayandırılmış dünya miqyasında qarşılıqlı tarifləri dayandırmaq üçün məhkəmə qərarı tələb edir.
Şayəstə Hüseynova
