Qlobal temperatur rekord səviyyələrə yüksəldikcə, iqlim böhranının təsirləri getdikcə dağıdıcı xarakter alır. Milyonlarla insan ekstremal hava hadisələri, quraqlıq və səhralaşmaya görə evlərini tərk edir.
Elchi.az xəbər verir ki, 2015-ci ildə imzalanan Paris İqlim Sazişi qlobal istiləşməni 1,5 dərəcə Selsi ilə məhdudlaşdırmağı hədəfləyirdi.
Bununla belə, 2024-cü ilə qədər dünyanın orta temperaturu artıq Selsi üzrə 1,6 dərəcəyə çatıb. Alimlər bu artımın əsrin sonuna qədər 3,1 dərəcə Selsiyə çata biləcəyini proqnozlaşdırırlar.
Donald Tramp neft və qaz hasilatını artırmaq üçün qalıq yanacaq layihələrini dəstəkləyərkən ABŞ-ı ikinci dəfə Paris sazişindən çıxarır. Argentina prezidenti Xavyer Milei iqlim dəyişikliyini “sosialist yalanı” kimi təsvir edir.
Birləşmiş Millətlər Təşkilatının məlumatına görə, ölkələrin 95 faizi 2035-ci il üçün yeni iqlim hədəfləri müəyyən etmək üçün son tarixi qaçırıb.
Planetin gələcəyi necə olacaq?
Hətta 2025-ci ilin ilk aylarında şiddətli iqlim hadisələri yüz milyardlarla dollar ziyana səbəb olub. Kaliforniyadakı meşə yanğınları iqlim dəyişikliyini tədqiq edən mütəxəssislər tərəfindən “gedərək daha tez-tez baş verən və şiddətli fəlakət” kimi təsvir edilmişdir.
2050-ci il proqnozlarına görə, Braziliyanın şərqində yağıntılar 287 millimetr azalacaq, Qrenlandiyada isə 369 millimetr artacaq.
Birləşmiş Millətlər Təşkilatı vurğulayır ki, ölkələr 2050-ci ilə qədər xalis sıfır karbon emissiyası hədəflərinə nail olmaq üçün çox daha sürətli hərəkət etməlidirlər. Ekspertlərin fikrincə, yüksək emissiya edən G20 ölkələri istixana qazı emissiyalarının azaldılmasında liderliyi öz üzərinə götürməlidir. Əks halda, iqlim böhranının nəticələri daha da dağıdıcı ola bilər.
Şayəstə Hüseynova
