Myanmada baş verən 7,7 və 6,4 bal gücündə zəlzələlərdə ölənlərin sayı 3003-ə çatıb.
Elchi.az xəbər verir ki, Myanma dövlət televiziyasının (MRTV) məlumatına görə, martın 28-də ölkədə baş vermiş zəlzələlərdə ölən və yaralananların sayı artıb.
Zəlzələlər nəticəsində ölənlərin sayı 3003-ə, yaralıların sayı isə 4639-a yüksəlib.
Hərbi hökumət Çin Qızıl Xaç Cəmiyyətinə atəş açıb.
Myanmar Now-ın məlumatına görə, ordunun sözçüsü general-mayor Zav Min Tun ordunun zəlzələdən zərər çəkmiş bölgələrə yardım çatdırmaq üçün şimaldakı Şan əyalətinə gedən Çin Qızıl Xaç Cəmiyyətinin karvanına atəş açdığını təsdiqləyib.
Taanq Milli Azadlıq Ordusunun nəzarətində olan ərazidən keçməyə çalışan 9 maşınlıq konvoyla bağlı Tun, “Karvanı dayandırmağa çalışdıq, lakin onlar dayanmadılar. Daha sonra təxminən 100 metr uzaqdan xəbərdarlıq atəşi açdıq” dedi.
Myanmada zəlzələlər.
Martın 28-də Myanmanın mərkəzindəki Saqainq bölgəsi yaxınlığında 7,7 və 6,4 bal gücündə iki zəlzələ baş verib. Zəlzələlər Tailand və Çində də güclü hiss olunub.
Zəlzələlər ölkədə böyük dağıntılara səbəb olsa da, ölənlərin sayının daha da artacağı ilə bağlı qorxular var.
Şayəstə Hüseynova
