Sinqapurda Daxili Təhlükəsizlik Departamentinin keçirdiyi əməliyyat nəticəsində məscidlərə hücuma hazırlaşan və İŞİD-ə qoşulmaq arzusunda olan 17 və 15 yaşlı iki nəfər yaxalanıb. 100 müsəlmanı öldürməyi hədəfləyən hücumçu Yeni Zelandiyadakı məscid qətliamını qəhrəman elan edib.
Elchi.az xəbər verir ki, Sinqapurda dəhşətli terror planının qarşısı təhlükəsizlik qüvvələrinin son dəqiqə əməliyyatı ilə alınıb. Daxili Təhlükəsizlik İdarəsi biri məscidlərə hücum etməyə hazırlaşan, digəri isə İŞİD-ə qoşulmaq istəyən iki gənci yaxalayıb.
17 yaşlı gənc ABŞ, Malayziya və Tailand kimi ölkələrdən silah almağa çalışıb. 2019-cu ildə Yeni Zelandiyada məscidə edilən hücumlarda 51 nəfəri öldürən Brenton Tarrantı “qəhrəman” elan edən hücumçu planlaşdırdığı hücumda ən azı 100 müsəlmanı öldürməyi hədəfləyib.
Digər şübhəli isə cəmi 15 yaşlı qızdır. Açıqlamaya görə, gənc qız İŞİD-ə qoşulub Suriyada döyüşmək və ya terrorçu ilə evlənmək istədiyini açıq şəkildə bildirib. Sinqapurun sərt Daxili Təhlükəsizlik Qanununa əsasən, hər iki şəxs məhkəməsiz iki ilə qədər həbs oluna bilər.
Səlahiyyətlilər 2015-ci ildən bu yana 20 yaşdan kiçik 17 nəfərin oxşar səbəblərlə cinayət məsuliyyətinə cəlb edildiyini açıqlayıb.Təhlükəsizlik bölmələri sosial şəbəkələrdə yayılan ekstremist ideologiyaların gəncləri hədəf alaraq daha da genişləndiyini açıqlayıb və sosial təminat baxımından həyəcanlı mənzərə yaranıb.
Nuranə Məmmədova
