Həmas və İsrail arasında qarşılıqlı məhbus mübadiləsi razılaşması çərçivəsində işğal altındakı İordan çayının qərb sahilindəki Ofer hərbi həbsxanasından girov götürülən 90 fələstinli uşaq və qadın azad edilib.
Elchi.az xəbər verir ki, Fələstinlilər HƏMAS və İsrail arasında atəşkəs razılaşması çərçivəsində İsrailin Ofer hərbi həbsxanasından azad edilən 90 fələstinli qadın və uşağı qarşılamaq üçün işğal altındakı İordan çayının qərb sahilindəki Ramallahın Beytuniya qəsəbəsində toplaşıb.
İsrail əsgərləri soyuqdan atəş yandıraraq bölgədə gözləyən fələstinlilərə ara-sıra gözyaşardıcı qaz və səs bombası ataraq müdaxilə edib. Saat əqrəbləri yerli vaxtla 01:00-ı göstərərkən çoxlu sayda İsrail hərbi cipləri və tikinti texnikası Beytuniya qəsəbəsinə basqın edib.
Gözyaşardıcı qaz və səs bombaları ilə müdaxilənin ardından İsrail hərbi cipləri fələstinliləri ərazidən uzaqlaşdırıb.
İsrail ordusunun Beytuniya qəsəbəsinə basqın etməsindən qısa müddət sonra Beynəlxalq Qırmızı Xaç Komitəsinin (BQXK) himayəsi altında fələstinli məhbusları daşıyan avtobus Ofer Hərbi Həbsxanasını tərk edib.
Şayəstə Hüseynova
