Aktau yaxınlığında qəzaya uğramış AZAL aviaşirkətinin təyyarəsinin 18 sərnişini Manqıstau vilayət xəstəxanasında qalır.
Elchi.az-ın Qazaxıstan KİV-lərinə istinadən verdiyi məlumata görə, bu barədə xəstəxananın tibbi xidmətlərin keyfiyyətinə nəzarət şöbəsinin rəhbəri Janar Baymanova məlumat verib.
“Onlardan beşi reanimasiyadadır – dördü ağır vəziyyətdə, bir qadın isə son dərəcə ağır vəziyyətdədir”, – deyə o bildirib.
J.Baymanovanın sözlərinə görə, sərnişinlərdə ən çox rast gəlinən xəsarətlər sınıqlar, qarın boşluğu, ağciyər travmaları, həmçinin açıq və qapalı kəllə-beyin travmalarıdır.
Ümumilikdə, təyyarə qəzasından sonra xəstəxanaya 27 nəfər yerləşdirilib.
“Onlardan səkkiz böyük və bir uşaq Rusiyaya köçürülüb, qalanları – Azərbaycan və Qırğızıstan vətəndaşları bizim xəstəxanada qalırlar”, – deyə o əlavə edib.
