Birləşmiş Ştatlarda tibb, iqlim, sosiologiya və iqtisadiyyat sahələrində çalışan 2000-ə yaxın tədqiqatçı prezident Donald Tramp administrasiyasının “ABŞ-da elmə qarşı hərtərəfli hücumla məşğul olduğunu” müdafiə edib.
Elchi.az xəbər verir ki, Tədqiqatçılar Amerika ictimaiyyətinə göndərdikləri məktubda Konqresi son vaxtlar federal ixtisarlardan ağır zərbə alan qurumlara maliyyəni bərpa etməyə çağırıblar.
Tədqiqatçılar səhiyyə və elm müəssisələrində işdən çıxarılmaların və maliyyə kəsilməsinin onların tədqiqatlarına zərər verdiyini və Tramp administrasiyasının “ABŞ-da elmə hərtərəfli hücumla məşğul olduğunu” bildirib.
Tədqiqatçılar qeyd ediblər ki, ABŞ-da müxtəlif administrasiyalar 80 ildən artıqdır ki, ölkənin tədqiqat müəssisəsinə töhfə verib və “təəccüblüdür ki, Tramp administrasiyası tədqiqat maliyyəsini kəsməklə, minlərlə alimi ixtisar etməklə, elmi məlumatlara ictimai çıxışı aradan qaldırmaqla və tədqiqatçılara ideoloji əsaslarla işlərini dəyişdirmək və ya tərk etmək üçün təzyiq etməklə bu müəssisəni sabitsizləşdirir”,- qiymətləndirməsini edib.
Tədqiqatçılar ölkədəki bir çox universitet və tədqiqat qurumlarının “Tramp administrasiyasını qəzəbləndirməmək və federal maliyyələşdirməni təhlükəyə atmamaq üçün səssiz qaldığını” bildirib və ölkənin elmi müəssisəsinin “məhv edildiyini” qeyd ediblər.
Martın 7-də Tramp administrasiyası Qəzzaya dəstək nümayişlərinin mərkəzində olan Kolumbiya Universitetinə ayrılan 400 milyon dollar vəsaiti “antisemitizmlə mübarizədə uğursuzluqlar” səbəbi ilə ləğv edib. Kolumbiya Universiteti federal maliyyəni itirmək riskinə girmək istəməyən Tramp administrasiyasının tələbləri ilə razılaşdı.
ABŞ Səhiyyə və İnsan Xidmətləri Departamenti martın 27-də Tramp administrasiyasının federal hökuməti ixtisar etmək planının bir hissəsi olaraq 10 min işçini ixtisar edəcəyini açıqlayıb.
ABŞ Qida və Dərman Administrasiyasının (FDA) Biologiyanın Qiymətləndirilməsi və Tədqiqi Mərkəzinin direktoru Peter Marks Səhiyyə və İnsan Xidmətləri katibi Robert F. Kennedinin peyvəndlərə qarşı mənfi mövqeyini əsas gətirərək martın 29-da tutduğu vəzifədən istefa verdiyini açıqlayıb.
Nuranə Məmmədova
