Qəzza hökuməti bildirib ki, İsrail Qəzza zolağına humanitar yardım və yanacağın girişini əngəlləyib və bu, bütün çörək zavodlarının bağlanmasına və bölgədə aclıq böhranının dərinləşməsinə səbəb olub.
Elchi.az xəbər verir ki, hökumətin Qəzzadakı media bürosunun yaydığı bəyanatda deyilir: “İsrail işğalçı qüvvələri Qəzzada olan 2 milyon 400 min fələstinliyə qarşı yeni cinayət törədib. Bir ay ərzində un, humanitar yardım və yanacağın ölkəyə girişini əngəlləyərək bütün çörəkbişirmə müəssisələrini tamamilə bağlayıb və aclıq böhranını dərinləşdiriblər. Bu vəziyyət mülki əhalinin həyatı üçün ciddi təhlükə yaradır”.
Bəyanatda İsrail və ABŞ administrasiyasının “bu dəhşətli cinayətə görə tam məsuliyyət daşıdığı” vurğulanıb və beynəlxalq ictimaiyyət və Birləşmiş Millətlər Təşkilatını (BMT) bu cinayətləri dayandırmaq üçün təcili müdaxilə etməyə çağırıb.
BMT-nin dəstəklədiyi bütün çörək zavodları fəaliyyətini dayandırıb
Qəzza zolağındakı Çörək Sahibləri Assosiasiyasının rəhbəri Abdel Nasser al-Acrami AA-ya deyib ki, “BMT-nin Ərzaq Proqramı tərəfindən dəstəklənən bütün çörək zavodları, İsrailin sərhədlərini bağlaması səbəbindən un, şəkər, duz, maya və dizel yanacağı kimi ehtiyatların tükənməsi səbəbindən fəaliyyətini dayandırıb”. dedi.
Acrami vurğulayıb ki, vəziyyət belə davam edərsə, yüz minlərlə qəzzalı böyük humanitar böhranla üzləşəcək.
İsrail martın 2-də Qəzzaya humanitar yardım, təcili yardım və tibbi ləvazimatların daxil olmasını əngəlləyib. Yerli hökumət və insan haqları hesabatlarına görə, bu, humanitar vəziyyətin daha da pisləşməsi ilə nəticələnib.
İsrailin baş naziri Benyamin Netanyahu martın 30-da Qəzzaya hücumları daha da gücləndirəcəklərini və ABŞ prezidenti Donald Trampın fələstinliləri zorla köçürmə planını həyata keçirəcəklərini açıqlayıb.
Yanvarın 19-da Qəzza zolağında qüvvəyə minən atəşkəsdən sonra İsrail ordusu martın 18-i səhər saatlarında şiddətli hücumlarını bərpa edib.İsrail ordusunun hücumlarını bərpa etdiyi vaxtdan əksəriyyəti yaşlı, qadın və uşaq olmaqla 1042-dən çox fələstinli həlak olub, 2542-dən çox insan isə yaralanıb.
İsrailin 7 oktyabr 2023-cü ildən Qəzza zolağına təşkil etdiyi hücumlarda həyatını itirən fələstinlilərin sayı 50 min 399, yaralıların sayı isə 114 min 583-ə yüksəlib.
Şayəstə Hüseynova
