Xüsusilə uşaqlar arasında artan virus soyuqdəyməyə bənzər əlamətlərlə özünü göstərir. Virus immuniteti zəif olan insanlarda, yaşlılarda və xroniki xəstəlikləri olanlarda ciddi tənəffüs yolları xəstəliklərinə səbəb ola bilər. Pekin rəhbərliyi bu artımı mövsümi vəziyyət kimi qiymətləndirsə də, yerli səhiyyə orqanları təcili tədbirlər görüb.
Elchi.az xəbər verir ki, əhaliyə şəxsi gigiyena qaydalarına diqqət yetirmək, insanların sıx olduğu mühitlərdən uzaq durmaq barədə xəbərdarlıq edilib.
Çindəki xəstəxanalarda maska taxan insanların foto və videoları sosial media platformalarında görünərkən, yerli xəbərlər HMPV epidemiyasının səhnələrinin COVID epidemiyasına bənzədiyini bildirdi.
HMPV nədir və necə ötürülür?
İlk dəfə 2001-ci ildə aşkar edilmiş insan metapnevmovirusu damcı yolu ilə keçən və soyuqdəymə, öskürək və burun axması kimi simptomlara səbəb olan tənəffüs yolu infeksiyasıdır. Virus üçün xüsusi müalicə və ya peyvənd yoxdur. Xəstəliyin müalicəsində simptomların yüngülləşdirilməsi ön plandadır. Çində artımın səbəbləri arasında qış aylarının təsirləri və izdihamlı yaşayış yerlərinin olduğu düşünülür. Mütəxəssislər bildirirlər ki, virus uşaqlar arasında sürətlə yayıla bilər, lakin hazırda ümumi səhiyyə sistemi üçün ciddi bir yük yaratmır.
İctimaiyyətə maskalardan istifadə və sosial məsafə saxlamaq kimi ehtiyat tədbirləri ilə özlərini qorumağa təşviq edilir. Virusun yayılmasını dayandırmaq üçün səlahiyyətlilər monitorinq proqramlarını artırıb və infeksiyanın cəmləşdiyi ərazilərdə əlavə sağlamlıq xidmətləri göstəriblər.
Bölgədə vəziyyət necədir?
Honq Konq bir neçə HMPV hadisəsi haqqında məlumat verdi. Kamboca və Tayvan kimi qonşu ölkələr vəziyyəti diqqətlə izləyir. Kambocanın Yoluxucu Xəstəliklərə Nəzarət Agentliyi HMPV-nin COVID-19 və qripə oxşarlığını qeyd edərək xəbərdarlıq etdi.
Yeganə
