Pilotsuz uçuş aparatları istehsalçısı olan Almaniyanın “Quantum-Systems” şirkəti Ukraynada “Vektor” pilotsuz uçuş sistemlərinin istehsalı üzrə fabrik açıb.
Elchi.az xəbər verir ki, bu barədə Ukrayna hərbi bölməsinin nümayəndələri məlumat veriblər.
Fabrik 2024-cü ilin yazında fəaliyyətə başlayıb və artıq Ukrayna Müdafiə Qüvvələrini kəşfiyyat aparatları ilə təmin edir. Hazırda pilotsuz təyyarələr Almaniyadan gətirilən komponentlərdən yığılır, lakin şirkət tədricən Ukraynada qanad və antena istehsal edərək istehsalı lokallaşdırır.
Zavod həmçinin dronların naviqasiya texnologiyasını təkmilləşdirmək üzərində işləyir. Müharibə zamanı həssas peyk şəbəkəsindən istifadə etmək əvəzinə, şirkət süni intellektə əsaslanan optik naviqasiya sistemi hazırlayır. Bu sistem dronlara pis görmə şəraitində belə obyektləri idarə etməyə və tanımağa imkan verəcək.
Ukrayna fabriki pilotsuz uçuş aparatlarını İsrail istehsalı olan optik modullarla təchiz edir ki, bu da obyektlərin gecə-gündüz monitorinqinə imkan verir. 2022-ci ildən etibarən bu pilotsuz təyyarələr Almaniya hökumətinin maliyyəsi sayəsində Müdafiə Qüvvələrinə verilir.
Fabrikin 2024-cü ilin sonuna qədər bu dronlardan daha 500-ü tədarük edəcəyi gözlənilir. Bundan əlavə, “Quantum-Systems” artıq Ukraynada xidmət və logistika mərkəzi, eləcə də tədqiqat və inkişaf mərkəzi açıb. Qeyd edək ki, “Vektor”un istehsalına 2018-ci ildə başlanılıb və dronun özü 2020-ci ildə bazara çıxarılıb. Onlar sənaye istifadəsi üçün yaradılıb, lakin ordu onları müşahidə və kəşfiyyat üçün qəbul edib.
Yeganə
