Ermənistan Nazirlər Kabineti: Paşinyan Putinə Bakı ilə sülh sazişi layihəsi barədə danışıb.
Ermənistanın baş naziri Nikol Paşinyan Rusiya prezidenti Vladimir Putinlə telefon danışığında Azərbaycanla sülh müqaviləsi üzrə danışıqların başa çatmasından danışıb.
Elchi.az RİA Novosti-yə istinadən xəbər verir ki, bu barədə Ermənistan hökumətinin mətbuat xidməti məlumat yayıb.
“Baş nazir “Ermənistan və Azərbaycan arasında sülhün və dövlətlərarası münasibətlərin yaradılması haqqında Saziş” layihəsinin mətninin təsdiq edilməsi və mətnin təsdiqi ilə bağlı danışıqların başa çatması barədə Rusiya Federasiyasının Prezidentinə məlumat verib”, – məlumatda deyilir.
Paşinyan və Putin regional və ikitərəfli münasibətləri də müzakirə ediblər.
Martın 13-də Bakı və İrəvan sülh müqaviləsinin mətni üzrə danışıqları başa çatdırdılar. Bunu XII Qlobal Bakı Forumunda Azərbaycan Xarici İşlər Nazirliyinin rəhbəri Ceyhun Bayramov deyib.
“Ermənistan sazişin razılaşdırılmamış son iki bəndi ilə bağlı Azərbaycan tərəfinin təkliflərini qəbul edib”, – Bayramov qeyd edib.
Diplomatın fikrincə, növbəti mərhələdə Ermənistan hələ də Azərbaycana qarşı ərazi iddialarını özündə əks etdirən konstitusiyaya dəyişiklik etməli olacaq.
Paşinyan bir qədər əvvəl bəyan etmişdi ki, İrəvan Avropa İttifaqı ilə münasibətləri dərinləşdirməyi hədəfləyir.
Şayəstə Hüseynova
