HƏMAS və İsrail arasında atəşkəs razılaşmasının birinci mərhələsi Netanyahu hökuməti tərəfindən qəsdən uzadılır.
Elchi.az xəbər verir ki, Misirin paytaxtı Qahirədə iki tərəf arasında atəşkəsin ikinci mərhələsi ilə bağlı danışıqlara başlayan HƏMAS bəyanatla çıxış edib.
HƏMAS bəyan edib ki, atəşkəsin birinci mərhələsi başa çatmalı və İsrailin geri çəkilməsi üçün dəqiq bir tarix təyin olunmalıdır.
Yanvarın 19-da əldə edilən üç mərhələli atəşkəs və əsir mübadiləsi razılaşması ilə İsrailin Qəzzada aylardır həyata keçirdiyi soyqırım və zülmə son qoyuldu. Netanyahu hökumətinin fələstinli məhbusları gec də olsa azad etməsi ilə Həmas ilə İsrail arasında 7-ci məhbus mübadiləsi tamamlandı. Bütün gözlər Qahirədə atəşkəsin ikinci mərhələsinə başlamaq üçün danışıqlara yönəlib. HƏMAS atəşkəsin birinci mərhələsini uzatmağa çalışan İsrailə qarşı bəyanat yayıb.
Misirin iki təhlükəsizlik mənbəsi bildirib ki, İsrailin paytaxt Qahirədəki nümayəndə heyəti atəşkəs razılaşmasının birinci mərhələsinin daha 42 gün uzadılmasını danışıqlar masasına gətirməyi nəzərdən keçirir.
İsrail mətbuatında yer alan xəbərlərə görə, Həmas mənbələri atəşkəs razılaşmasının birinci mərhələsinin uzadılmasına qarşıdırlar. “Müharibənin başa çatması və İDF-nin tam çıxarılması üçün dəqiq bir tarix təyin edilmədikcə, bütün girovların azad edilməsini gözləmək mümkün deyil”, – adının açıqlanmasını istəməyən mənbə bildirib.
Məlumata görə, Həmas uzun müddət saxlanılan fələstinli məhbusların azad edilməsini, məhbuslar üçün şəraitin yaxşılaşdırılmasını və xəstə və ölü israilli girovlar müqabilində Qəzzaya daha çox yardım axınını nəzərdə tutan kompromis irəli sürüb.
Atəşkəs razılaşmasının birinci mərhələsinin bu həftə yekunlaşması gözlənilir.
Nuranə Məmmədova
