Birləşmiş Ərəb Əmirlikləri (BƏƏ) və İran ortaq maraq sahələrini həll etmək və ikitərəfli əməkdaşlığı gücləndirmək məqsədi daşıyan siyasi məsləhətləşmələrin birinci mərhələsini keçirib.
Elchi.az xəbər verir ki, BƏƏ Xarici İşlər Nazirliyindən verilən yazılı açıqlamada, paytaxt Əbu-Dabidə keçirilən siyasi məsləhətləşmə toplantısının BƏƏ-nin xarici işlər nazirinin siyasi məsələlər üzrə müavini Lana Nəsibə və İran xarici işlər nazirinin siyasi məsələlər üzrə müavini Məcid Təxt Rəvançinin sədrliyi ilə keçirildiyi bildirilib.
Bəyanatda iki ölkənin siyasi məsləhətləşmələrin birinci raundunun keçirilməsini alqışladığı qeyd edilib, bu məsləhətləşmələrin ümumi maraq sahələrinin həlli və ikitərəfli əməkdaşlığın genişləndirilməsi üçün bir fürsət kimi əhəmiyyəti vurğulanıb.
Bildirilib ki, siyasi məsləhətləşmələrin birinci raundunda BƏƏ-nin Tehrandakı səfiri Seyf əl-Zuabi və İranın Əbu-Dabidəki səfiri Rza Amiri, eləcə də yüksək səviyyəli nümayəndə heyətləri iştirak ediblər.
İranın rəsmi xəbər agentliyi İRNA-nın xəbərinə görə, iki ölkənin nümayəndə heyətləri arasında keçirilən danışıqlarda “siyasi və iqtisadi sahələrdə ikitərəfli əlaqələr, həmçinin regional və beynəlxalq hadisələr” müzakirə edilib.
İran xarici işlər nazirinin siyasi məsələlər üzrə müavini Rəvançi Birgə Siyasi Məşvərət Komitəsinin əhəmiyyətinə və onun iki ölkə arasında koordinasiyanın artırılmasındakı roluna diqqət çəkib.
R.Rəvançi ümidvar olduğunu bildirib ki, bu görüşləri mütəmadi keçirməklə tərəflər ikitərəfli sazişlərin icrasını sürətləndirəcək və yeni əməkdaşlıq istiqamətləri müəyyən edəcəklər.
İran rəsmisi həmçinin ölkəsinin regional və beynəlxalq hadisələrlə bağlı mövqeyini nəzərdən keçirərək, “İsrailin Fələstindəki cinayətləri və regionda sabitliyi pozan addımları ilə bağlı İslam ölkələrinin mövqelərinin birləşdirilməsinin zəruriliyini” qeyd edib.
BƏƏ və İran arasında ikitərəfli münasibətlərin möhkəmləndirilməsi səyləri çərçivəsində siyasi məsləhətləşmələrin birinci raundu keçirilir və son vaxtlar bu istiqamətdə konkret addımlar atılır.
BƏƏ-İran Birgə İqtisadiyyat Komitəsinin ilk iclası 2024-cü ilin may ayında Əbu-Dabidə BƏƏ-nin iqtisadiyyat naziri Abdullah bin Tavk Əl-Merri və daha sonra İranın iqtisadiyyat naziri Mehrdad Bazrpasın sədrliyi ilə müxtəlif iqtisadi sektorlarda əməkdaşlığın artırılmasını müzakirə etmək üçün keçirilib.
Bundan əlavə, Tehranda iki ölkə arasında ticarət və investisiya əməkdaşlığının artırılması məqsədi ilə 2023-cü ilin may ayında “Expo Iran” sərgisi çərçivəsində BƏƏ-İran İşgüzar Şurasının ilk iclası keçirilib.
Nuranə Məmmədova
