Ağ Ev rəhbəri Donald Tramp əmindir ki, ABŞ bir sıra ölkələrə tariflərin artırılmasını təxirə salmağı göstəriş verdiyi 90 günlük müddət bitmədən Avropa İttifaqı (Aİ) üzvləri ilə ticarət sazişi bağlaya biləcək.
Elchi.az xəbər verir ki, o, bunu Ağ Evdə İtaliyanın Baş naziri Corcia Meloni ilə görüşün əvvəlində jurnalistlərin suallarını cavablandırarkən deyib.
“Təbii ki, ticarət sazişi olacaq. Aİ ölkələri bunu çox istəyirlər. Biz ticarət sazişi bağlayacağıq. Mən bunu tamamilə gözləyirəm. Bu, ədalətli razılaşma olacaq”, – Tramp bildirib.
Tramp əmin edib ki, ABŞ digər ölkələrlə ticarət sazişləri bağlamağa “tələsmir”.
Xatırladaq ki, Tramp aprelin 2-də 185 ölkə və ərazinin məhsullarına idxal rüsumunun tətbiq ediləcəyini açıqlamışdı. 10%-lik universal tariflər aprelin 5-dən, fərdi tariflər isə aprelin 9-dan qüvvəyə minib. Rusiya siyahıda yoxdur. Aprelin 9-da Tramp danışıqlara hazır olduqlarını nümayiş etdirən 75 ölkəyə tarif artımını 90 gün müddətinə dayandırdığını açıqlamışdı. Onlara 10% idxal rüsumları tətbiq olunacaq.
