Almaniya Ukraynaya süni intellektlə təchiz edilmiş və elektron müharibə sistemlərinə (EW) davamlı “Helsing” zərbə pilotsuz təyyarələri verməyə başlayacaq.
Elchi.az-ın xəbərinə görə, “Bild” qəzeti mənbələrə istinadən yazır ki, “Taurus” qanadlı raketlərinə bənzətməklə qeyri-rəsmi olaraq “mini-Toros” adlandırılan bu qurğular böyük həcmdə göndəriləcək.
Planlara görə, Almaniya hər ay Ukraynaya bir neçə yüz pilotsuz təyyarə ötürəcək. Ümumi tədarük həcmi 4 min ədəd olacaq. Yeni pilotsuz təyyarələr Ukrayna Silahlı Qüvvələrində artıq xidmətdə olan analoji PUA-lardan dörd dəfə böyük uçuş məsafəsinə malikdir. Onlar tankları və ya möhkəmləndirilmiş strukturları məhv etmək üçün kifayət qədər güclü partlayıcı maddələr daşımağa qadirdirlər.
Nəşrin mənbələrindən biri bildirib ki, pilotsuz təyyarələr öz yerlərini müstəqil olaraq müəyyən edə bilir, operatorlara hətta əlverişsiz hava şəraitində belə kursu saxlamağa kömək edir. “Hədəf aşkar edildikdə və operator ona işarə etdikdə, dron praktiki olaraq özü ona doğru uçur”, – deyə mənbə izah edib və əlavə edib ki, rabitə və idarəetmə pozulsa belə, pilotsuz təyyarə hədəfi vura biləcək.
Bundan əvvəl Almaniyanın müdafiə naziri Boris Pistorius Ukrayna məsələsində Rusiya ilə dialoqun davam etdirilməsinin vacibliyini vurğulamışdı. Eyni zamanda o qeyd edib ki, bu cür səyləri Kiyevin dəstəyi ilə birləşdirmək lazımdır. Bununla belə, nazir Moskvanın mövqe dəyişikliyinə şübhə etdiyini bildirib.
Yeganə
