Qolubev: “Hücuma məruz qalan NEZ-in ərazisində PUA-nın parçaları tapılıb”
Rusiyanın Ukrayna ilə sərhədindəki Rostov vilayətində yerləşən “Novoşaxtinsk” Neft Emalı Zavodu (NEZ) pilotsuz uçuş aparatlarının (PUA) hücumuna məruz qalıb. AYNA TASS-a istinadən bildirir ki, hücumdan sonra zavodda yanğın olub.
Rostov vilayətinin qubernatoru Vasili Qolubev özünün “Telegram” kanalında yazıb ki, müəssisənin ərazisində PUA-ların qırıntıları aşkarlanıb.
“Versiyalardan birinə görə, yanğına dronların zavodun texniki qurğularına hücumu səbəb olub. Zavodun ərazisində iki PUA fraqmentləri tapılıb”, – qubernator vurğulayıb.
Qubernatorun sözlərinə görə, yanğın 50 kvadratmetr ərazini əhatə edib: “Yanğın saat 10:50-də söndürülüb. İtki yoxdur, bütün şəxsi heyət təxliyə edilib”.
O, həmçinin zavodun işinin dayandırıldığını, ərazidə əməliyyat-istintaq tədbirlərinin aparıldığını, nəticədə dəyən ziyanın ekspertlər tərəfindən qiymətləndiriləcəyini və müəssisənin fəaliyyətinin bərpasının mümkünlüyünü bildirib.
Hadisə şahidləri tərəfindən PUA-ların zərbəsinin videosu yayılıb. Kadrlar hücum anını əks etdirir, bundan sonra yanğın başlayır. Təsdiqlənməmiş məlumatlara görə, videoda Türkiyə istehsalı olan “Bayraktar” əks olunub.
TASS-ın mənbəsinin məlumatına görə, PUA-lardan biri kamikadze rolunu oynayıb.
“Onlardan biri istilik dəyişdiricisinə çırpıldı, sonra yanğın başladı”, – mənbə qeyd edib.
