İsrail ordusunun gecə boyu Qəzza zolağının müxtəlif bölgələrində həyata keçirdiyi hücumlarda ölən və yaralananların olduğu bildirilib.
İsrail xalqı ac-susuz qalmağa məcbur edərək böyük humanitar fəlakətə səbəb olduğu Qəzza zolağına hücumlarını 334-cü gündür davam etdirir.
Elchi.az xəbər verir ki, Fələstinin rəsmi agentliyi WAFA-nın xəbərinə görə, İsrail ordusu Qəzza zolağının şimalında, Qəzza şəhərinin Ed-Durc rayonunda bir evi bombalayıb.
İlkin məlumata görə, hücum nəticəsində bir nəfər ölüb, çoxlu sayda insan yaralanıb.
İsrail döyüş təyyarələri Qəzza şəhərinin Es-Sahabe rayonunda bir ailənin sığındığı müvəqqəti daxmanı bombalayıb, hücumda 4 nəfər yaralanıb.
İsrail ordusu Qəzza şəhərinin cənubundakı Zeytun rayonunda da onlarla yaşayış məntəqəsini partlayıcılarla partladıb.
Qəzza şəhərinin Tel Əl-Hava və Zeytun məhəllələrində 8-ci küçə ətrafındakı evlərə pilotsuz uçuş aparatlarının (PUA) müşayiəti ilə hərbi maşınlar tərəfindən intensiv hücum təşkil edilib.
İsrail artilleriyası həmçinin Nusayrat Qaçqınlar Düşərgəsi və Qəzza zolağının mərkəzi hissəsinin şimal hissələrini, Qəzza zolağının cənubunda Xan Yunus və Rəfah şəhərlərini intensiv artilleriya atəşinə tutub. Hücumlarda ölən və yaralananlar olub.
Səhiyyə Nazirliyinin dünən Qəzzada verdiyi açıqlamaya görə, İsrailin 7 oktyabrdan bu yana Qəzza zolağına təşkil etdiyi hücumlarda ən az 16 min 673-ü uşaq, 11 min 269-u qadın olmaqla 40 min 819 adam həyatını itirib. 94 min 291 nəfər yaralanıb.
Dağıntılar altında hələ də minlərlə ölü olduğu bildirilərkən, insanların sığındığı xəstəxana və təhsil müəssisələri hədəf alınaraq mülki infrastruktur da məhv edilir.
Nuranə Məmmədova
