Sakit okean sahillərinə doğru irəliləyən “Dujuan” tayfunu səbəbindən Yaponiyada iki nəfər həyatını itirib. Hava yolları şirkətlərinin fırtına ilə əlaqədar təhlükəsizlik tədbiri olaraq ümumilikdə 275 reysi ləğv etməsi nəticəsində paytaxt Tokiodakı Haneda Hava Limanında nəqliyyat əlaqəsi dayanıb.
Elchi.az xəbər verir ki, “Kyodo” xəbər agentliyinin məlumatına görə, Yaponiya Meteorologiya Agentliyi “Dujuan” tayfununun Yaponiyanın mərkəzi və şərq hissələrinin Sakit okean sahillərinə doğru hərəkət etdiyini bildirib.
Tayfunun səbəb olduğu güclü yağış və torpaq sürüşməsi təhlükəsi ilə əlaqədar, Tokiodan 100 kilometr cənubda yerləşən İzu adalarının ən böyüyü olan İzu Oşima adası üçün ən yüksək səviyyəli xəbərdarlıq elan edilib.
Tayfun Yaponiyada beş günlük tətil dövrünə təsadüf edib; bu da Tokioda nəqliyyat xidmətlərində fasilələrə və bəzi tədbirlərin ləğvinə səbəb olub.
Tayfunun Tokiodan şərqdə yerləşən Çiba prefekturasından keçəcəyi gözlənilir.
İki nəfər həyatını itirib
Tayfun Tokioya güclü yağışlar gətirib, Çiba və Kanaqava prefekturalarında isə torpaq sürüşmələrinə səbəb olub.
Rəsmilər Çiba və Kanaqavada iki nəfərin tayfun nəticəsində öldüyünü bildiriblər.
“All Nippon Airways” və “Japan Airlines” şirkətləri Tokiodakı Haneda Hava Limanına və oradan həyata keçirilən 270-dən çox reysin ləğv edildiyini elan ediblər; bu qərar təxminən 40 000 sərnişinə təsir göstərib.
“Nikkei” qəzetinin məlumatına görə, Tokio və ətrafdakı altı prefekturada ümumilikdə 1,9 milyon insan təxliyə edilib.
Şayəstə
