Avropa İttifaqının (Aİ) Xarici İşlər və Təhlükəsizlik Siyasəti üzrə Ali Nümayəndəsi Kaya Kallas Beynəlxalq Cinayət Məhkəməsinin (BVM) “güclü təzyiq” altında olduğunu bildirib və məhkəmənin qorunmasının vacibliyini vurğulayıb.
Elchi.az xəbər verir ki, Kallas BMT Baş Assambleyasının 81-ci sessiyası çərçivəsində Nyu-Yorkdakı BMT Baş Qərargahında keçirilən “Beynəlxalq humanitar hüququn qorunmasında humanitar diplomatiya” adlı tədbirdə çıxış edib.
Beynəlxalq humanitar hüququn tətbiqində məsuliyyət prinsipinin əhəmiyyətini qeyd edən Kallas mövcud mexanizmlərin qorunmalı olduğunu bildirib və milli məhkəmələrlə yanaşı, beynəlxalq məhkəmələrin – o cümlədən Beynəlxalq Ədalət Məhkəməsi (BƏM) və BVM-in – müdafiə edilməsinin zəruriliyini vurğulayıb.
“Olmalı olduğu vəziyyətin əksinə olaraq, BVM hazırda güclü təzyiq altındadır”, – deyə Kallas bildirib.
BVM-ə və onun hakimlərinə göstərilən təzyiqin sadəcə bir qurumla məhdudlaşmadığını vurğulayan Kallas qeyd edib: “Bu hərəkətlər İkinci Dünya Müharibəsindən sonra qurulmuş beynəlxalq hüquq nizamına sadiqliklə bağlı suallar doğurur”.
Kallas BVM-in qorunmasının zəruriliyini xüsusi vurğulayıb.
“Problem hüquqda deyil, cəzasızlıqdadır”
Beynəlxalq hüququn əvvəlkindən daha çox inkişaf etdiyini və əlçatan olduğunu qeyd edən Kallas bildirib: “Problem hüquqda deyil, cəzasızlıqdadır. Cəzasızlıq isə yeni cəzasızlıq hallarına yol açır”.
Kallas məhkəmə mexanizmlərinin müdafiə edilməli olduğunu və mövcud mexanizmlərin kifayət etmədiyi hallarda yeni mexanizmlərin yaradılmalı olduğunu qeyd edib.
“Ədaləti təmin etmək iradəsi olan yerdə həmişə bir yol tapılır”. Kallas hüquqi işlərin düzgün qurulması üçün sübutların toplanması və qorunub saxlanılmasının vacibliyinə diqqət çəkib.
Şayəstə
