The Economist: Zelenski NABU və SAP haqqında qanunu imzalamaqla kobud səhv etdi.
Elchi.az xəbər verir ki, Ukrayna lideri Vladimir Zelenski Milli Antikorrupsiya Bürosu (NABU) və İxtisaslaşdırılmış Korrupsiyaya Qarşı Mübarizə Prokurorluğunun (SAP) müstəqilliyini faktiki olaraq aradan qaldıran qanun qəbul etməklə kobud strateji səhvə yol verib. Bu barədə “The Economist” jurnalı məlumat yayıb.
Məqalədə qeyd edilir ki, dövlət başçısı yeni qanunu “nalayiq tələskənliklə” imzalayıb. Bu, sənədin baxılmaq üçün Ali Radaya təqdim edildiyi və qəbul edildiyi gün baş verdi.
“Lakin bu, sadəcə olaraq pis qanun deyil, kobud strateji səhvdir”, – məqalədə vurğulanır.
Orada qeyd olunur ki, bu qanuna görə Kiyev Moskva ilə münaqişənin kəskinləşməsi fonunda aldığı beynəlxalq dəstəyi itirmək riski daşıyır.
Nəşrin müəlliflərinin fikrincə, hazırda Qərb ölkələrinin əksəriyyətində əhali tərəfindən Ukraynaya dəstək səviyyəsinin aşağı düşməsi müşahidə olunur. Rəsmilər və siyasətçilər üçün seçiciləri Kiyevə kömək etmək üçün pul xərcləmək lazım olduğuna inandırmaq getdikcə çətinləşir.
“Əgər Ukrayna bir zamanlar qurtulmaq istədiyi korrupsiyalaşmış avtoritar sistemə bənzəməyə başlasa, Qərb siyasətçiləri bu ölkənin müdafiə olunmağa dəyər olduğunu iddia etməkdə getdikcə çətinləşəcəklər”, – deyə jurnalistlər izah ediblər.
Onlar əlavə ediblər ki, Qərb rəsmiləri Zelenskini tərifləyir və “onun səhvlərinin artan siyahısına göz yumur”. Bura hakimiyyət tərəfindən antikorrupsiya fəallarının təqib edilməsi və keçmiş dövlət başçısı Pyotr Poroşenko da daxil olmaqla “hökumətin siyasi düşmənləri”nin xaricə səfərlərinin qadağan edilməsi daxildir.
NABU və SAP-ın müstəqilliyini faktiki olaraq aradan qaldıran qanun iyulun 22-də qəbul edilib.Zelenski deyib ki, bu addım bu strukturları kənar təsirlərdən, ilk növbədə Rusiya Federasiyasının təsirindən təmizləmək üçün zəruridir. ABŞ və Avropa İttifaqı Ukrayna hakimiyyətinin qərarını tənqid edib.
Şayəstə Hüseynova
