Azərbaycanın sabiq xarici işlər naziri Tofiq Zülfüqarovun Dərbəndlə bağlı paylaşımı ölkə ictimaiyyətində, o cümlədən Rusiyada müzakirələrə səbəb olub. Keçmiş nazir Dərbəndin Rusiyanın ən qədim şəhəri olduğunu bildirib və vurğulayıb ki, əhalisinin təxminən 40 faizi azərbaycanlılardan ibarətdir.
Zülfüqarov həmçinin şəhərdə yaşayan azərbaycanlılara Dərbəndi tərk etmələri üçün çağırış edildiyini söyləyib. “Bizə “Azərbaycanımıza get” deyənlər nə demək istəyir? Yerli xalq öz torpağını tərk etməlidir”, – deyə qeyd edən sabiq nazir, azərbaycanlıların orada avtoxton xalq olduğunu xatırladıb.
Elchi.az Tofiq Zülfüqarovun Globalinfo.az-a müsahibəsini təqdim edir:
– Tofiq bəy, son Dərbənd yazınız Kremlə yaxın bəzi təbliğatçı dairələrdə narahatlıq doğurub. Radikal mövqeyi ilə seçilən “Çarqrad” və digər media platformaları dərhal “Azərbaycanlılar Rusiyanın yerliləridirmi?” sualını gündəmə gətirərək mövzunu şişirdiblər. Belə reaksiya ilə qarşılaşmağınızın səbəbi nədir?
– Rus millətçilərinin belə reaksiya verməsi gözlənilən idi. Onların təhsil və bilik səviyyəsi adətən çox aşağıdır. Onlara danılmaz faktlar təqdim ediləndə panikaya düşürlər. Mən yeni bir şey deməmişəm, bütün məlumatlar vikipediyada da mövcuddur, istənilən şəxs oradan oxuya bilər. Millətçilərin təşvişə düşməsi normaldır və hətta bununla razıyam. Bəziləri öz siyasi baxışlarını yenidən nəzərdən keçirməlidirlər. Çünki onların “millətçiliyi” və “vətənpərvərliyi” əslində dövlətin əsaslarını sarsıdan siyasətdir.
– Dərbənd məsələsinin hazırkı mərhələdə gündəmə gətirilməsinin səbəbi nədir?
– Rusiya çoxmillətli dövlətdir. Dərbənddə yaşayan azərbaycanlılar bu dövlətin avtoxton xalqıdır. Mənim dediklərim Dağıstan rəhbərinin fikirləri ilə üst-üstə düşür (gülür). Bu baxımdan məni nədəsə ittiham etmək onlar üçün demək olar ki, mümkün deyil. Sadəcə olaraq, özlərinə sərf etməyən məlumatları təhrif olunmuş şəkildə təqdim edirlər. Bu onların işidir. Rusiya siyasi elitasında yetərincə insan var ki, bu cür “millətçilərin” siyasətinin təkcə Bakı-Moskva münasibətlərinə deyil, həm də Rusiyanın özünə zərər verdiyini anlayır. Mən bu məsələyə ona görə diqqət yetirirəm ki, azərbaycanlılara qarşı təzyiqlər güclənir və bunun qarşısını almaq üçün belə işləri davam etdirməliyik.
– Dərbənddə yaşayan həmin 40 faiz etnik azərbaycanlının taleyi necə olacaq?
– Digər azərbaycanlılardan fərqli baxmaq istəməzdim. Onlar da Rusiya dövlətinin vətəndaşlarıdır. Rusiyada yaşayan digərləri də eyni qaydada. Coğrafi baxımdan hansı vətəndaş hansı hüquqlara malikdirsə, onların da hüquqları eyni olmalıdır. Bu baxımdan, milli mənsubiyyətindən asılı olmayaraq, vətəndaşların hüquqları bərabərdir.
– Rusiyada yaşayan azərbaycanlıların müxtəlif təzyiqlərlə üzləşdikləri məlumdur. Dərbənddə yaşayanlar da eyni taleyi yaşayacaqlarmı?
– Bu kimi halların yaşanmaması üçün çalışmalıyıq. Azərbaycan vətəndaşı kimi buna qarşı imkanlarım daxilində mübarizə aparacağam. Əminəm ki, mənimlə eyni mövqedə olan yüzlərlə, minlərlə azərbaycanlı var. Mən Rusiya Federasiyasında anadan olmuşam, atam müharibədən sonra Rostovda həkim işləyirdi. O vaxt həkim çatışmazlığı vardı və atam orada çalışmaq üçün göndərilmişdi. Bunu deməyimin səbəbi var. İndiki mərhələdə bu cür siyasət Rusiya və Azərbaycan qanunlarına, dünya ölkələrinin beynəlxalq norma və standartlarına ziddir. Biz buna qarşı öz sözümüzü deməliyik.
