Almaniya kansleri Fridrix Merts bildirib ki, Ukrayna 2027-ci ilə qədər Avropa Birliyinə üzv ola bilməyəcək.
Elchi.az xəbər verir ki, Mertsin sözlərinə görə, 2027-ci il yanvarın 1-də Aİ-yə daxil olmaqdan söhbət gedə bilməz. Bu, mümkün deyil.
Onun sözlərinə görə, Aİ-yə üzvlük üçün bütün namizədlər lazımi meyarlara cavab verməlidirlər və Ukrayna da istisna deyil. Ölkənin tələblərə cavab verməyə başlaması üçün ən azı daha bir neçə il keçməlidir: “Bu, uzunmüddətli prosesdir”, – Merts vurğulayıb.
Bununla belə, o, əlavə edib ki, Kiyevin ittifaqa üzv olmaq perspektivi olmalıdır.
Bundan əvvəl Ukrayna prezidenti Volodimir Zelenski bəyan etmişdi ki, Aİ-yə qoşulmaq Kiyev və Avropa üçün əsas təhlükəsizlik təminatlarından biridir: “Buna görə də biz konkret tarixdən – 2027-ci ildən danışırıq və tərəfdaşlarımızın mövqeyimizə dəstəyinə ümid edirik”, – Ukrayna lideri qeyd edib.
Amerika, Ukrayna və Avropa rəsmiləri daha əvvəl “Washington Post”-a bildiriblər ki, Ukraynanın 2027-ci ildə Aİ-yə daxil olması sülh planının bir hissəsi kimi müzakirə olunur. Bununla belə, onlar qeyd ediblər ki, Aİ-nin bəzi üzvləri, xüsusən də Macarıstan belə bir addımın əleyhinədir.
Bir sıra avropalı rəsmilər də Reuters ilə söhbətlərində 2027-ci ilə qədər Ukraynanı qəbul etməyin tamamilə qeyri-mümkün olduğunu vurğuladılar.
Yeganə
