Paytaxt Karakasda bir televiziya kanalına danışan Venesuela prezidenti Nikolas Maduro ABŞ-ın Karib dənizindəki hərbi fəaliyyəti ilə bağlı “Heç kim Venesuelanı aşağılaya bilməz. Biz ABŞ-ın təhqirini əsla qəbul etməyəcəyik” deyib.
Elchi.az xəbər verir ki, Maduro Vaşinqtonun Venesuelanı hədəf almasını “narkotiklərlə mübarizə adı altında maskalanmış kampaniya” kimi qiymətləndirib.
ABŞ-a reaksiya verən Maduro deyib:
“Heç kim Venesuelanı aşağılaya bilməz. Biz ABŞ-ın təhqirini heç vaxt qəbul etməyəcəyik. Venesuelada heç bir nəsil imperializm qarşısında əyilməyəcək. Heç vaxt, bu gün deyil, sabah da deyil. Siz narkotik bəhanəsi ilə bizə hücum etməyə çalışırsınız, amma biz bunun fərqindəyik. Sizin əsl niyyətiniz rejimimizi devirmək və sərvətimizi əlimizdən almaqdır. Biz həm bu ordunu, həm də xalqı müdafiə etməyə hazır edirik”. Maduro, ABŞ-ın dünyanın ən böyük narkotik istehlakçısı olduğunu ifadə edərək, “ABŞ bu məsələ ilə həqiqətən narahat deyil. Vətəndaşlarının yüksək narkotik istehlakından qaynaqlanan ciddi bir ictimai sağlamlıq problemini həll etmək üçün çox az iş görür” dedi. Maduro Ümumdünya Gömrük Təşkilatının məlumatlarına istinadən ABŞ-a göndərilən Kolumbiya kokainin 70 faizinin Ekvador limanlarını tərk etdiyini iddia edib.
Şayəstə Hüseynova
