Cənubi Koreyanın avtomobil nəhəngi Hyundai Motor Group, 2028-ci ildən etibarən dünya miqyasında fabriklərində humanoid robotlardan istifadə etməyə başlayacağını açıqladı. Atlas adlı və Boston Dynamics tərəfindən hazırlanan robot, Las Vegasda keçirilən İstehlak Elektronikası Sərgisində (CES) təqdim edildi.
Elchi.az xəbər verir ki, Hyundai, ABŞ-ın Corciya ştatındakı müəssisəsi də daxil olmaqla, Atlas-ı bütün qlobal şəbəkəsinə inteqrasiya etməyi planlaşdırır. Şirkət rəsmiləri, humanoid robotların əvvəlcə fiziki cəhətdən çətin və təhlükəli vəzifələri yerinə yetirəcəyini, nəticədə daha mürəkkəb işlərdə insanlarla birlikdə avtonom işləyəcəyini bildirdilər.
Məşğulluq və texnologiya investisiyaları
Hyundai-nin vitse-prezidenti Jaehoon Chang, robotların işlərini insanlardan alacağı ilə bağlı narahatlıqları dilə gətirdi. Chang, robotların təlimi və idarə olunması kimi sahələrdə insan əməyinə ehtiyac qalacağını bildirdi.
Şirkət əvvəllər Donald Trampın ölkədə istehsalı artırmaq planlarını dəstəkləmək üçün ABŞ-a 20 milyard dollardan çox investisiya qoyacağını açıqlamışdı. Bu investisiyalara avtonom idarəetmə texnologiyaları və süni intellekt tədqiqatları daxildir. Hyundai-dan başqa, Amazon, Tesla və Çin şirkəti BYD kimi nəhəng şirkətlər də əməliyyatlarında humanoid robotlardan istifadə etmək səylərini davam etdirirlər.
Corciyadakı zavodda baş verən hadisələr
Atlas robotlarının istifadə ediləcəyi müəssisələr arasında olan Corciyadakı batareya fabriki 2025-ci ildə genişmiqyaslı immiqrant basqını ilə gündəmə gəldi. Əməliyyat zamanı 300 Cənubi Koreya vətəndaşı da daxil olmaqla yüzlərlə işçi saxlanıldı və hadisə Cənubi Koreyada böyük qəzəblə qarşılandı. Cənubi Koreya prezidenti Li Ce Myunq və Hyundai şirkətinin baş direktoru Xose Munoz bu cür müdaxilələrin xarici investisiyaların qarşısını ala biləcəyi barədə xəbərdarlıq etdilər. Böhrandan sonra Vaşinqton və Seul administrasiyaları işçilərin azad edilməsi ilə bağlı razılığa gəldilər və Ağ Evin Hyundai rəhbərliyinə hadisəyə görə təəssüfləndiyini bildirdiyi bildirildi.
Şayəstə
