Türkiyənin 1,5 milyard dollarlıq “Polad Qübbə” hava hücumundan müdafiə qurğusu bütün dünyada manşetlərə çevrilir. ABŞ mətbuatı bu böyük sərmayəni “Türkiyə tarixindəki ən böyük müdafiə sənayesi təşəbbüsü” olaraq xarakterizə edərək, obyektin tamamlanmasından sonra Avropanın ən böyük inteqrasiya edilmiş hava hücumundan müdafiə bazası olacağını yazıb.
Elchi.az xəbər verir ki, Türkiyənin 1,5 milyard dollarlıq “Polad Qübbə” hava hücumundan müdafiə qurğusu ABŞ mətbuatının gündəm mövzusuna çevrilib. Newsweek və Vaşinqtonda nəşr olunan müdafiə jurnalı “Breaking Defence” Ankaranın müdafiə addımını “Türkiyə tarixində ən böyük müdafiə sənayesi sərmayəsi” kimi qiymətləndirib.
“Breaking Defense” müxbiri Agnes Helou tərəfindən imzalanan hesabatda aşağıdakı ifadələr yer alır:
Layihəni idarə edən Aselsan rəsmilərinin sözlərinə görə, 1,5 milyard dollarlıq yeni obyekt Türkiyənin milli hava hücumundan müdafiə sistemi olan “Polad Günbəz” üçün mərkəz olacaq və istehsal gücünü iki qat artıracaq. Bu investisiya Ankaranın NATO-dakı rolunu gücləndirə və Avropada güc balansını dəyişə bilər.
Prezident Rəcəb Tayyib Ərdoğanın sözləri də vurğulanıb:
“Bu obyekt həm də Avropanın ən böyük inteqrasiya olunmuş hava hücumundan müdafiə qurğusu olacaq”.
Xəbərdə sistemin NATO ilə tam uyğun olduğu da qeyd edilib:
Aselsan rəhbərləri Polad Qübbənin bütün komponentlərinin NATO ilə uyğunlaşdığını bildiriblər. Türkiyə təkcə özünün deyil, həm də müttəfiqlərinin səmasını qoruya biləcək hava hücumundan müdafiə imkanlarına nail olub.
ABŞ mətbuatı obyektin əhəmiyyətini bu sözlərlə qiymətləndirib:
“İsrailin Dəmir Qübbəsinə bənzər öz Polad Günbəz sistemini inkişaf etdirərək Türkiyə özünü təkcə regional deyil, həm də qlobal müdafiə oyunçusu olduğunu sübut etdi. Ankara Avropanın hava hücumundan müdafiəsinin yeni güc mərkəzinə çevriləcək”.
Nuranə Məmmədova
